Вазорати корҳои дохилии Туркия аз боздошти 233 нафар бо гумони иртибот ва маблағгузории гурӯҳи террористии ДОИШ хабар дод. Ба иттилои Алӣ Ерлиқоя, вазири корҳои дохилӣ, ин амалиёт давоми ду ҳафта дар 33 шаҳри кишвар, аз ҷумла Анқара, Анталия, Истанбул, Самсун ва Шанлиурфа анҷом шудааст.

Ба гуфтаи мақомоти турк, аз шумори боздоштшудагон 51 нафар ба зиндон интиқол ёфта, барои 24 нафари дигар назорати додгоҳӣ муқаррар шудааст. Баррасии парвандаҳои боқимонда идома дорад.

Ерлиқоя дар паёме дар шабакаи иҷтимоии «Х» навиштааст, ки амалиёт бо ҳамоҳангии Идораи кулли иттилооти пулис, Идораи мубориза бо терроризм ва Созмони миллии иттилооти Туркия (МИТ) роҳандозӣ шуд.

Мақомот мегӯянд, гумонбарон ба узвият дар ДОИШ ва таъмини молии ин гурӯҳ айбдор мешаванд.

Дар моҳҳои охир Туркия муборизаи худро алайҳи гурӯҳҳои тундрав, аз ҷумла ДОИШ пурзӯр кардааст. Танҳо дар моҳи июли соли ҷорӣ нерӯҳои амниятии Туркия 150 нафарро бо гумони узвият дар ин гурӯҳ боздошт намуда буданд.

Dialog.tj