Як гурӯҳи хакерӣ бо истифода аз ҳуши маснуӣ системаи электронии санадҳои Тоҷикистонро рахна карда, беш аз 2 ҳазор санадҳои ниҳодҳои амниятии Тоҷикистонро рабудаанд.

Дар ин бора хабаргузории “Ройтерз” бо такя ба гузориши ширкати сингапурии “CloudSek”, ки вобаста ба амнияти киберӣ пажӯҳиш анҷом медиҳанд, хабар дод.

Тибқи иттилои “Ройтерз” пажӯҳишгарони ширкати номбурда фаъолияти гурӯҳеро ошкор намудаанд, ки аз барномаи “Hermes” барои ба нақша гирифтани ҳамлаҳои киберӣ ва ҷамъоварии маълумот истифода бурдааст.

Тибқи натиҷаҳои таҳқиқот, хакерҳо тақрибан аз нимаи моҳи август ба омӯзиши низомҳои иттилоотӣ шуруъ карда, баъди чанд ҳафта ба низоми электронии ҳуҷҷатгузории Тоҷикистон дастрасӣ пайдо кардаанд.

Гуфта мешавад, агентии ҳуши маснуӣ барои зеркашӣ ва гурӯҳбандии ҳуҷҷатҳо барномаи махсус таҳия карда, маълумоти ҷамъоваришударо ба қисмҳо ҷудо намудааст.

“CloudSek” ин гурӯҳро “Silent Lynx” номида, таъкид кардааст, ки муҳаққиқони дигар низ онро ба Қазоқистон иртибот медиҳанд. Аз ҷумла, истифодаи забони русӣ дар иртиботот, фаъолияти хакерҳо дар соатҳои кории маъмули Қазоқистон ва пайвастшавӣ аз тариқи интернети ин кишвар аз далелҳои зикршуда мебошанд.

“Ройтерз” менависад, ки мақомоти Тоҷикистон ва Қазоқистон ба дархости ин хабаргузорӣ барои шарҳи ҳодиса то замони нашри гузориш посух надодаанд. Ҳамчунин, талошҳо барои тамос бо намояндагони гурӯҳи “Silent Lynx” натиҷа надодаанд.

Ин ҳодиса дар ҳоле ошкор мешавад, ки истифодаи ҳуши маснуӣ дар ҳамлаҳои киберӣ нигаронии мутахассисони амнияти иттилоотиро бештар кардааст. Ба арзёбии “CloudSek”, чунин технологияҳо акнун на танҳо дар фаъолияти ҷинояткорони интернетӣ, балки дар амалиёти гурӯҳҳои тахассусии ҷосусии киберӣ низ истифода мешаванд.

Dialog.tj