Ҳузури чор ҳунарпешаи шинохтаи тоҷик – Қурбон Собир, Таҳмина Раҷабова, Моҳпайкар Ёрова ва Манучеҳр Ҳабибов дар сериали телевизионии “Пойтахт” –и Эрон бинандагонро шигифтзада кардааст.

Дар силсилафилми телевизионии “Пойтахт” як хонаводаи чор нафараи тоҷик ҳамроҳ мешавад ва дар идома лаҳзаҳои ҷолибу диданӣ ба вуҷуд меояд. Бархе киношиносони эронӣ аз ҳузури ҳунармандони тоҷик дар ин сериал интиқбол намуда, бархеи дигар гуфтаанд, ки пайвастани як хонаводаи тоҷик моҳияти сериалро, ки муҳити Мозандарони Эронро ба намоиш мегузорад, сунъӣ нишон медиҳад.

Ҳунармандони тоҷик ҳамчун хонаводаи чорнафараи тоҷик вориди қисса гардида, бо хонаводаи Муамалӣ (Нақӣ) робита барқарор мекунанд.

Дар сериали “Пойтахт” дар вақти ба меҳмонӣ омадани оилаи тоҷик ба назди Нақӣ саҳнае нишон дода мешавад, ки дар он паридани кӯлоҳи Шамшер (исми қаҳрамони филм, ки Қарбони Собир нақш меофарад) зоҳир мешавад, ки ӯ “тату”-и коммунистӣ дорад. Маълум мегардад, ки ӯ дар замони боздошт аз сӯйи коммунистон Иттиҳоди Шӯравиро дар сараш “тату” (холкӯбӣ) кардааст. Ӯ бо ҳадафи коштани мӯй ба Теҳрон омода, вале қабл аз он ба меҳмонӣ ба хонаи Муамалӣ меравад.

Расонаҳои Эрон дар мавриди ҳунарпешаҳои тоҷик, ки дар ин силсилафилм нақш бозидаанд, маълумот дода ва аз ҳузури онҳо дар сериали эронӣ истиқбол намудаанд.

Сериали телевизионии “Пойтахт” яке аз сериалҳои сербинандаи Эрон аст, ки имрӯз аз сӯйи шабакаҳои телевизионии ин кишвар пахш шуда, мавриди писанди тамошобинон воқеъ шудааст.

Dialog.tj