Замир Кобулов, намояндаи вижаи президенти Федератсияи Русия Владимир Путин рӯзи 10-юми ноябр дар Кобул бо Вазири корҳои хориҷии гурӯҳи террористии Толибон Амирхон Муттақӣ мулоқот намуда, дар баробари масъалаҳои сиёсиву иқтисодӣ, вазъияти мубориза бо маводи мухаддирро баррасӣ намуд.

Дар ин бора хабаргузории “Пажвок”-и Афғонистон гузориш дода, навишт, ки ҳамчунин, ду ҷониб масъалаи густариши робитаҳои тиҷоратӣ ва рушди ҳамкориҳои иқтисодии Маскав ва Кобулро баррасӣ карданд.

Тибқи иттилоъ, Амирхон Муттақӣ дар ин мулоқот хостори рушди равобит бо Русия шуда, таъкид кардааст, ки ҳар ду кишвар аз имкониятҳои иқтисодиву тиҷоратии якдигар истифода кунанд. Амирхон Муттақӣ иддао кардааст, ки ҳукумати Толибон барои ҷилавгирӣ аз кишт, истеҳсол ва интиқоли маводи мухаддир талошҳои пайваста анҷом медиҳанд. Ӯ гуфта, ин иқдомҳо на фақат барои Афғонистон, балки барои амнияти тамоми минтақа аҳамият доранд.

Замир Кобулов аз иқдомҳои Толибон  дар ҷиҳати мубориза бо маводи мухаддир ситоиш карда, гуфтааст, ки  баъзе созмонҳои байналмилалӣ дар гузориши худ вазъияти воқеии Афғонистонро дуруст инъикос намекунанд.

Хушбинии Замир Кобулов ва Амирхон Муттақӣ дар бораи мубориза бо маводи мухаддир дар Афғонистон дар ҳолест, ки гузориши СММ дар бораи истеҳсоли афюн дар ин кишвар чизи дигар аст.

Дафтари СММ оид ба маводи мухаддир ва ҷинояткорӣ дар гузориши ахири худ хабар дода буд, ки ҳаҷми истеҳсоли афюн дар Афғонистон дар соли 2026 нисбат ба соли гузашта тақрибан панҷ баробар афзоиш ёфтааст.

Бар асоси ин гузориш, истеҳсоли афюн аз тақрибан 300 тонна дар соли 2025 ба наздики 1 ҳазору 500 тонна дар соли 2026 расидааст. Афзоиши майдони кишти кӯкнор ва беҳтар шудани ҳосил аз сабаби боришоти бештар аз омилҳои асосии ин раванд арзёбӣ шудаанд.

Dialog.tj