Намояндаи Тоҷикистон дар шаҳри Доҳаи Қатар дар Конфронси ваколатдорони Иттиҳоди байналмилалии алоқа (ITUPP) ширкат намуда, масъалаи ҳамкориҳо дар самти рушди соҳаи алоқаро баррасӣ кард.

Дар ин бора Хадамоти алоқаи назди Ҳукумати Ҷумҳурии Тоҷикистон хабар дод, ки нишасти Шурои Иттиҳоди минтақавии алоқа рӯзи 10-уми ноябр дар шаҳри Доҳаи Қатар баргузор шуд. Дар ин нишаст намояндагони кишварҳои узви иттиҳодия масъалаи ҳамоҳансозии ҳамкориҳо дар доираи Конфронси ваколатдорони Иттиҳоди байналмилалии алоқа (ITU)-ро баррасӣ карданд.

Яке аз мавзуҳои муҳимми нишаст ба ҳам наздик кардани мавқеи ҳайатҳои милли кишварҳои узв оид ба масъалаҳое буд, ки дар конфронси байналмилалӣ мавриди баррасӣ қарор гирифт. Намояндагони кишварҳои узв зарурати идомаи робитаҳои доимӣ ва ҳамоҳангсозии фаъодияти ҳайатҳоро дар рӯзҳои баргузории ин ҳамоиш таъкид намуданд.

Тибқи барномаи конфронс намояндагони кишварҳои Иттиҳоди минтақавии алоқа дар давоми нишаст ҳар рӯз мулоқотҳои ҳамоҳангсозӣ баргузор мекунанд. Дар ин мулоқот ҷонибҳо табодули назар намуда, масъалаҳои наверо, ки дар ҷараёни конфронс матраҳ мешавад, мавриди гуфтугӯ қарор медиҳанд.

Конфронси ваколатдорони Иттиҳоди байналмилалии алоқа аз 9 то 27-уми ноябр дар шаҳри Доҳаи Қатар баргузор мешавад. Ин ниҳод мақоми олии қабули қарорҳои Иттиҳоди байналмилалии алоқа ба ҳисоб рафта, ҳар чор сол як маротиба баргузор мешавад.

Дар ин конфронс намояндагони 194 кишвари узви созмон, инчунин, ширкатҳо ва ташкилотҳои байналмилалии фаъол дар соҳаи телекоммуникатсия ва технологияҳои иттилоотию коммуникатсионӣ ширкат доранд.

Мавзуъҳои асосии рӯзномаи конфронс ояндаи алоқаи ҷаҳонӣ, рушди технологияҳои рақамӣ, инфрасохтори телекоммуникатсионӣ ва густариши ҳамкориҳои байналмилалӣ дар ин соҳа мебошанд. Дар ҷараёни он кишварҳои иштирокдор самтҳои сиёсати умумии созмон, нақшаҳои стратегии фаъолияти минбаъда ва масъалаҳои молиявиро муайян карда, роҳбарияти олии онро интихоб мекунанд.

Ширкати Тоҷикистон дар ин нишаст дар ҳолест, ки рушди инфрасохтори рақамӣ ва густариши дастрасӣ ба технологияҳои муосири алоқа аз масъалаҳои муҳимми ҳамкориҳои байналмилалии кишвар ба шумор мераванд.

Dialog.tj