Британияи Кабир имконияти сармоягузорӣ дар истихроҷу коркарди маъданҳои стратегӣ дар Тоҷикистонро баррасӣ мекунад. Ин кишвар дар пайи пайдо намудани манбаъҳои нави ашёи хом ва коҳиш додани вобастагиаш аз Чин мебошад.

Намояндагони созмони бритониёии “Eurasia Critical Minerals Organisation” (ECMO) рӯзи 6-уми ноябр бо масъулони Кумитаи давлатии сармоягузорӣ ва идораи амволи давлатии Тоҷикистон масъалаи ҷалби сармоя ба соҳаи истихроҷи маъданро баррасӣ кардаанд.

Дар ин бора рӯзи 9-юми ноябр сомонаи “RTVI” гузориши муфассал нашр карда, афзуд, ки ҷонибҳо ҳамчунин, рушди саноати кӯҳкорӣ ва фароҳам овардани шароити мусоид барои сармоягузорони хориҷиро муҳокима карданд. Дар бораи имзои созишномаҳои мушаххаси сармоягузорӣ ҳанӯз хабар дода нашудааст.

Британияи Кабир асосан ба захирмаҳои сурма, нуқра, тилло ва сурби Тоҷикистон таваҷҷуҳ кардааст. Бар асоси иттилои Бонки аврупоии таҷдид ва рушд дар Тоҷикистон беш аз 600 кони дорои тақрибан 50 навъи маъдан ба қайд гирифта шудааст.

Британияи Кабир мехоҳад манбаъҳои таъмини маъданҳои стратегиро гуногун карда, вобастагии худро аз Чин коҳиш диҳад. Тибқи маълумоти ҳукумати Британия, Чин тақрибан 70 дарсади истихроҷ ва 90 дарсади коркарди ҷаҳонии унсурҳои нодири заминиро дар ихтиёр дорад.

Ҳамкории ду кишвар дар ин соҳа аз соли 2025 фаъолтар шудааст. Он замон ширкати бритониёии “Vast Resources” бо Вазорати саноат ва технологияҳои нави Тоҷикистон ёддошти тафоҳумро барои омӯзиши имконоти ҷустуҷӯи конҳои металлҳои стратегӣ имзо карда буд.

Британияи Кабир ҳамзамон бо Қазоқистон, Қирғизистон ва Ӯзбекистон низ дар самти истихроҷ ва коркарди маъданҳои муҳим ҳамкорӣ дорад.

Тоҷикистон метавонад ба яке аз манбаъҳои нави таъмини ашёи хоми стратегии Британия табдил ёбад, аммо то ҳол дар бораи ҳаҷми сармоягузориҳои мушаххас дар ин самт иттилоъ дода нашудааст.

Dialog.tj