Рӯзҳом 2-юм ва 3-юми июни соли равон дар шаҳри Душанбе Ҷаласаи 8-уми Комиссияи муштараки ҳамкориҳои тиҷоратӣ, иқтисодӣ ва илмӣ-техникии Ҷумҳурии Тоҷикистон ва Ҷумҳурии Исломии Покистон баргузор гардид.

Гуфта мешавад, ки ҷаласа таҳти раёсати ҳамраисони Комиссия – Далер Ҷумъа, вазири энергетика ва захираҳои оби Ҷумҳурии Тоҷикистон ва Сардар Аваис Аҳмад Хан Леғарӣ, вазири федеролии энергетикаи Ҷумҳурии Исломии Покистон бо иштироки ҳайатҳои васеи ҳар ду ҷониб доир шуд. 

Тавре ки маркази матбуоти Вазорати энергетика ва захираҳои оби Ҷумҳурии Тоҷикистон хабар медиҳад, дар ҷаласа масоили ҳамкориҳои дуҷонибаи иқтисодӣ дар бахшҳои мухталиф, аз ҷумла, тиҷоратӣ, сармоягузорӣ, кишоварзӣ, энергетика, маориф, бонкдорӣ, илму технология, сайёҳӣ, сиёсати ҷавонон, варзиш, нақлиёт ва коммуникатсия мавриди баррасии ҷонибҳо қарор гирифт.

"Зикр гашт, ки дар соли 2025 гардиши савдои хориҷӣ байни Ҷумҳурии Тоҷикистон ва Ҷумҳурии Исломии Покистон 43 миллион доллари ИМА-ро ташкил дода, дар моҳҳои январ-марти соли 2026 ба маблағи 8,9 миллион доллари ИМА баробар гардид", - омадааст дар иттилоия. 

Гуфта мешавад, ки дар ҷаласа ҳамзамон, аҳамияти муҳими лоиҳаи минтақавии интиқоли неруи барқи «CASA -1000» барои рушди ҳамкориҳои кишварҳо дар соҳаи энергетика зикр гардид.

"Ҷонибҳо аз натиҷаҳои ҷаласаи навбатии Комиссияи муштарак изҳори қаноатмандӣ намуда, таъкид карданд, ки татбиқи қарорҳои қабулшуда барои таҳкими бештари муносибатҳои дӯстона ва шарикии мутақобилан судманд миёни Ҷумҳурии Тоҷикистон ва Ҷумҳурии Исломии Покистон заминаи мусоид фароҳам хоҳад овард", - зикр мегардад дар иттилоия.

Dialog.tj