Ҷумҳурии Тоҷикистон ҳадаф дорад ҳамкориҳоро бо кишварҳои минтақа дар соҳаи энергетика густариш дода, низоми барқи худро ба шабакаи ягонаи энергетикии Осиёи Марказӣ пайваст намояд. Рушди хатҳои интиқоли неруи барқ ва таҷдиди инфрасохтори мавҷудуда аз вазифаҳои асосӣ дар ин самт мебошад.

Далер Ҷумъа, вазири энергетика ва захираҳои оби Ҷумҳурии Тоҷикистон дар назди вакилони Маҷлиси намояндагони Тоҷикистон доир ба ин масъала изҳори назар кард.

Вазири энергетика ва захираҳои оби Ҷумҳурии Тоҷикистон таъкид намуд, ки Тоҷикистон барои тақвият додани мавқеи худ дар бозори минтақавии энергетика амалӣ намудани чанд лоиҳаи муҳимро идома медиҳад. Аз ҷумла, лоиҳаи интиқоли неруи барқи CASA-1000, сохтмони хатти баландшиддати «Ҷануб–Шимол» ва пайвастани шабакаҳои барқи шимоли кишвар ба низоми умумии энергетикии Осиёи Марказӣ аз ҷумлаи ин ташаббусҳо мебошанд.

Ҳамзамон, мақомоти энергетикӣ барои кам кардани талафоти неруи барқ чораҳои нав меандешанд. Дар нӯҳ моҳи соли ҷорӣ ҳаҷми талафоти барқ дар кишвар ба 12,5 дарсад баробар шудааст. Ин рақам дар муқоиса бо ҳамин давраи соли гузашта 2,7 банди фоизӣ коҳиш ёфтааст.

Вазири энергетика таъкид кардааст, ки барои идомаи ин раванд насби ҳисобкунакҳои рақамӣ, дақиқтар кардани низоми бақайдгирии истеъмоли барқ ва навсозии шабакаҳои интиқол зарур аст.

Дар баробари масъалаҳои техникӣ, ислоҳоти қонунгузории соҳа низ мавриди баррасӣ қарор гирифтааст. Ба гуфтаи Далер Ҷумъа, таҳияи Кодекси энергетикӣ метавонад барои танзими муносибатҳои ҳуқуқӣ, фароҳам овардани шароити мусоид барои сармоягузорони хусусӣ ва ташаккули бозори рақобатпазири неруи барқ замина гузорад. Рақамикунонии соҳа ва баланд бардоштани самаранокии идоракунӣ низ аз ҳадафҳои ин ислоҳот мебошанд.

Вазир таъмини бозори дохилӣ бо маҳсулоти сӯзишворӣ ва ташкили захираҳои зарурии он барои пешгирӣ аз норасоии маводи сӯхтро низ вазифаи муҳим номидааст.

Дар барномаи минбаъдаи Вазорат идомаи сохтмони НБО «Роғун», навсозии неругоҳҳои мавҷуда, истифодаи васеътари манбаъҳои барқароршавандаи энергия ва беҳтар кардани ҳолати шабакаҳои барқӣ пешбинӣ шудааст. Ҳамзамон, коҳиши талафоти неруи барқ ва такмили идоракунии захираҳои об аз самтҳои дигари фаъолияти он хоҳанд буд.

Dialog.tj