Далер Ҷумъа, вазири энергетика ва захираҳои оби Ҷумҳурии Тоҷикистон бо намояндаи Ассотсиатсияи энергетикии Иёлоти Муттаҳидаи Амрико Мелисса Бровн мулоқоти маҷозӣ анҷом дод.

‎Бинобар иттилои маркази матбуоти Вазорати энергетика ва захираҳои оби Ҷумҳурии Тоҷикистон, зимни суҳбат ҷонибҳо вазъи кунунӣ ва дурнамои рушди ҳамкориҳои дуҷонибаи Ҷумҳурии Тоҷикистон ва Иёлоти Муттаҳидаи Амрикоро дар соҳаи энергетика баррасӣ карданд.

Гуфта мешавад, ки таваҷҷуҳи махсус ба тавсеаи ҳамкорӣ дар самтҳои истифодаи манбаъҳои барқароршавандаи энергия, ҷалби сармоягузорӣ ва татбиқи технологияҳои муосир зоҳир гардид.

“‎Дар идомаи муколама масъалаҳои калидӣ, аз ҷумла пешрафти сохтмони Неругоҳи барқи обии «Роғун», татбиқи лоиҳаи минтақавии интиқоли неруи барқи CASA-1000, рушди неругоҳҳои офтобӣ, ҳифзи пиряхҳо ҳамчун манбаи муҳими захираҳои обӣ ва инчунин ҷорӣ намудани технологияҳои зеҳни сунъӣ дар соҳаи энергетика мавриди муҳокима қарор гирифтанд”, - зикр мекунад манбаъ.

‎Иттилоъ дода мешавад, ки ҷонибҳо омодагии худро барои таҳкими минбаъдаи ҳамкорӣ ва татбиқи лоиҳаҳои муштарак, ки ба таъмини рушди устувори соҳаи энергетика ва баланд бардоштани иқтидори содиротии Тоҷикистон мусоидат мекунанд, изҳор намуданд.

Dialog.tj