Кумитаи рушди сайёҳии назди Ҳукумати Ҷумҳурии Тоҷикистон озмуне эълон кард, ки ба Рӯзи ҷаҳонии сайёҳӣ бахшида шудааст. Рӯзи ҷаҳонии сайёҳӣ ҳар сол 27-уми сентябр таҷлил мегардад.

Тибқи иттилоъ озмун дар панҷ номинатсияи зерин доир мегардад:

Беҳтарин ширкати сайёҳӣ;

Беҳтарин меҳмонхона;

Беҳтарин ресторан;

Беҳтарин роҳбалад;

Беҳтарин блогер ва тарғибгар ба воситаи сомонаҳо дар дохил ва хориҷи кишвар.

Тавре Кумита зикр мекунад, мақсади озмун рушди бахши сайёҳӣ, ҳавасмандкунии субъектҳои хизматрасониҳои сайёҳӣ, рӯзноманигорон, блогерҳо ва коршиносони мустақил ба хотири таблиғу пешбурди иқтисоди сайёҳии кишвар, густариш додани навъҳои хизматрасонӣ ва ҷалби сайёҳони хориҷӣ хоҳад буд.

Дар озмун ширкатҳои сайёҳӣ, меҳмонхонаҳо, тарабхонаҳо, роҳбаладҳо, журналистон ва шахсоне, ки ба талаботи муқаррароти озмун посухгӯ мебошанд, метавонанд ширкат намоянд.

Ҳуҷҷатҳои довталабон то 10-уми сентябри соли ҷорӣ қабул карда мешавад.

Ғолибон дар ҳар як аз панҷ номинатсия бо диплом ва мукофоти пулӣ сарфароз гардонда мешаванд. Илова бар ин, шахсоне, ки дар доир кардани озмун саҳми фаъол доранд ва барои татбиқи он ҳиссаи арзанда мегузоранд, бо номаҳои сипос қадрдонӣ хоҳанд шуд.

Dialog.tj