Эмомалӣ Раҳмон, Президенти Ҷумҳурии Тоҷикистон рӯзи 20-уми июл дар деҳаи Сайроби ҷамоати деҳоти Панҷоби ноҳияи Мир Сайид Алии Ҳамадонӣ корхонаи нави истеҳсоли асфалту бетонро расман ба истифода доданд.

Корхонаи истеҳсоли асфалту бетон, ки аз сӯи соҳибкори ватанӣ Абдулазиз Ҷобиров дар доираи татбиқи сиёсати ободкоронаи ҳукумати Тоҷикистон бунёд шудааст, дар масоҳати беш аз 8 гектар бо арзиши умумии 2 миллиону 520 ҳазор сомонӣ сохта шуда, бо таҷҳизоти муосири истеҳсоли хориҷӣ муҷаҳҳаз гардидааст.

Тибқи иттилоъ, иқтидори хатҳои истеҳсолӣ дар як соат ба 70 тонна асфалт ва 60 метри мукааб бетон мерасад. Бо фаъол шудани корхона беш аз 100 ҷойи нави корӣ муҳайё гардида, дар марҳилаи баъдӣ бо бунёди коргоҳи сеюм шумораи кормандон ба 120 нафар хоҳад расид.

Мақомоти давлатӣ мегӯянд, истифодаи маҳсулоти ватанӣ дар корҳои сохтмонӣ, бахусус роҳсозӣ, хароҷоти таъмири роҳро коҳиш дода, сифати корҳоро боло мебарад. Таҷҳизоти хати истеҳсолӣ аз ширкатҳои пешрафтаи хориҷӣ харидорӣ гардида, ба талаботи меъёрҳои сохтмонӣ мутобиқ мебошад.

Ифтитоҳи корхона дар доираи татбиқи Барномаи “Солҳои рушди саноат” ва омодагӣ ба ҷашни 35 – солагии Истиқлоли давлатӣ амалӣ гардида, ҷузъи муҳимми ҳадафҳои стратегии саноатикунонии босуръати кишвар арзёбӣ мегардад.

Сарвари кишвар дар вақти боздиди иншоот ба сифати корҳои сохтмонӣ ва васлу насби таҷҳизот баҳои мусбат дода, барои истифодаи самаранок ва истеҳсоли маҳсулоти рақобатпазир ба масъулин дастурҳои мушаххас ироа намуданд.

Dialog.TJ