Тоҷикистон тасмим гирифт, ки барои интиқоли неруи барқи Роғун ба иҷрои созишномаи ҳамкорӣ дар соҳаи энергетика бо Ҷумҳурии Ӯзбекистон оғоз кунад.

Ин санад оғози марҳилаи нави ҳамкориҳои ду кишвар хоҳад буд ва шароити интиқоли неруи барқи Неругоҳи барқи обии Роғун ба кишвари ҳамсояро фароҳам хоҳад кард.

Дар марҳилаи аввал то замони пурра ба анҷом расидани сохтмони неругоҳ, интиқоли барқ фақат дар мавсими киштукор, аз апрел то сентябр сурат хоҳад гирифт. Маҳз дар ҳамин давра, дар минтақаҳои кишоварзии Ӯзбекистон истеъмоли неруи барқ хеле зиёд мешавад. Баъд ба кор даромадани пурраи тамоми иқтидорҳои Роғун интиқоли барқ ба таври доимӣ ва солона ба роҳ монда хоҳад шуд.

Созишномаи нави энергетикӣ барои муҳлати 20 сол ба имзо расида ва имкон дорад, ки ба таври худкор барои давраҳои даҳсолаи дигар тамдид шавад.

Ҷадвали интиқол ва ҳаҷми неруи барқ дар асоси созишномаи мустақими ширкатҳои Барқи тоҷик ва ширкати миллии энергетикии Ӯзбекистон мушаххас хоҳад шуд.

Ду ҷониб гуфтаанд, ки ихтилофоти эҳтимолӣ ба воситаи музокироти мустақим ҳаллу фасл мегардад.

Ин ҳамкорӣ дар пасманзари талошҳои минтақа барои таъмини амнияти энергетикӣ ва рушди шабкаи барқии минтақавӣ сурат гирифта, метавонад ба коҳиши вобастагӣ аз сарчашмаҳои сӯзишвории зараровар ва густариши иқтисоди сабз мусоидат намояд.

Dialog.tj