Тибқи иттилоъ, ҳадафи асосии баргузор шудани намоишгоҳи мазкур муаррифии иқтидори саноатии кишвар, рушди ҳамкориҳои иқтисодию тиҷоратӣ бо кишварҳои шарик ва ҷалби сармоягузории байналмилалӣ ба имкониятҳои содиротии Тоҷикистон мебошад.

Ҳамчунин, иқдоми мазкур дар доираи амалисозии Ҳадафи чоруми стратегияи миллии рушд, саноатикунонии босуръати кишвар сурат мегирад ва барои баланд бардоштани нуфузи Тоҷикистон дар сатҳи минтақа ва байналмилалӣ хеле муҳим мебошад.

Дар намоишгоҳ беш аз 100 корхонаи истеҳсолии ватанӣ иштирок намуда, маҳсулоти мухталифи соҳаи саноати мошинсозӣ, химия, маъдан, нассоҷӣ, хӯрокворӣ, технологияҳои иттилоотӣ, масолеҳи сохтмон, ангишт ва энергетикӣ намоиш дода мешаванд. Дар намоиши мазкур воситаҳои нақлиёти мусофиркашӣ, боркаш, ҳарбӣ-муҳофизатӣ ва техникаи кишоварзӣ, ки дар Тоҷикистон тарроҳӣ ва истеҳсол шудаанд, ба номиш гузошта шуданд.

Масъулони соҳи саноати Тоҷикистон таъкид намуданд, баргузор шудани чунин чорабиниҳо имконият фароҳам мекунад, ки миёни кишварҳои ватанӣ ва шарикони хориҷӣ робитаҳои нав барқарор шуда, лоиҳаҳои муштараки истеҳсолӣ бо ҷалби технологияҳои муосир роҳандозӣ шаванд.

Намоишгоҳ ҳамчунин, ба меҳмонони хориҷӣ, аз ҷумла намояндагони созмонҳои байналмилалӣ, муассисаҳои илмӣ ва молиявӣ, бахши хусусӣ ва иштирокчиёни Конфронси ҳифзи пиряхҳо имкон фароҳам овард, ки бо рушди саноати Тоҷикистон аз наздик шинос шаванд.

Dialog.tj