19 Ноябр 2026,
панҷшанбе, 01:39, Душанбе
28.02.2025 17:33

Истгоҳи конвертории Сангтӯда – нахустин ва бузургтарин истгоҳи конвертории Осиёи Марказӣ омодаи фаъолият аст

99 фисад корҳои васлу насб ва сохтмонии Истгоҳи конвертории Сангтӯда, ки дар доираи Лоиҳаи CASA – 1000 сохта мешавад, ба анҷом расида ва он дар ҳоли оғоз ба фаъолият аст. Ин нуктаро намояндагони лоиҳа зимни боздиди рӯзноманигорони кишвар аз объекти мазкур, баён карданд.

Рӯзи 27-уми феврал як гурӯҳи рӯзноманигорон аз расонаҳои гуногуни кишвар бо мақсади бозбинӣ аз Истгоҳи конвертории Сангтӯда ба ноҳияи Кушониён сафар намуда ва аз ҳолати кунунии он хабардор шуданд.

“Аз ҷониби Комиссияи кории дохилии лоиҳа Истгоҳи конвертории Сангтӯда пурра аз санҷиш гузаронида шуд, аз ҷумла санҷиши шиддати зеристгоҳҳо низ амалӣ карда шуд (зеристгоҳҳои ҷойгирбуда дар шаҳри Исфара ва Турсузода). Яъне озмоиши санҷишӣ бомуваффақият амалӣ гашт. Ҳоло интизор ҳастем, ки барои зеришиддатмонии санҷиши Истгоҳи конвертории Сангтӯда иҷозат гирем. Тибқи қарордоди басташуда онро бояд пудратчӣ аз санҷиши умумӣ гузаронад ва ба фармоишгар пешниҳод намояд. Ҳамчунин, танҳо бояд санҷиши системавӣ гузаронида шавад, ки он дар сурати ба анҷом расидани сохтмони истгоҳи минтақаи дигар, яъне Покистон анҷом дода мешавад” - мегӯяд Бобохонзода Исмоил, сармутахассиси Лоиҳаи минтақавии  CASA – 1000.

Истгоҳи конвертории Сангтӯда аз таҷҳизоти филтрӣ иборат буда ва қисмати ҷараёнҳои доимии он ба ҳолати автоматикӣ гузошта шудааст, ки он ба таври фосилавӣ идора карда мешавад. Ҳамчунин, тамоми қисматҳои он аз муҳофизати чандтабақа иборат аст.

Бояд таъкид кард, ки таҷҳизоти асосии Истгоҳи конвертории Сангтӯда аз якчанд кишвари ҷаҳон, аз ҷумла Шветсия, Ҷумҳурии Мардумии Чин, Шветсария, Австрия ва Ҳиндустон оварда шудааст.  Аксари таҷҳизоти асосӣ, инчунин, иловагӣ низ дорад ва дар сурати пеш омадани ноқисӣ онҳо ба таври автоматикӣ фаъол мешаванд.

Ба таъкиди намояндагони Лоиҳаи минтақавии CASA – 1000 сохтусози Истгоҳи конвертории Сангтӯда дар вақти муайяншуда ва бидуни норасоӣ сохта шудааст: “Дар корҳо ҳеч таъхире сурат нагирифт ва хушбахтона, ҳамаи он мувофиқи нақша бо сифати баланд анҷом ёфт” - мегӯяд  Шералӣ Ширинбеков, сармутахассиси лоиҳаи мазкур.

Истгоҳи конвертории Сангтӯда барои интиқоли 1300 МВт барқи истеҳсолшавандаи Тоҷикистону Қирғизистон ба Покистон дар 6 моҳи гармӣ пешбинӣ шудааст.

Ёдовар мешавем, ки сохтмони Истгоҳи конвертории Сангтӯда фасли баҳори соли 2019 оғоз гардида ва дар ҳудуди 25 гектар сохта шудааст. Дар кори он номдортарин ширкатҳои ҷаҳонӣ ҷалб гардидаанд ва аз ҷумла аксари таҷҳизоти он аз ширкати машҳури “Hitachi Energy” харида шудааст. “Hitachi Energy” ширкати машҳури технологиест, ки қароргоҳи он дар Сюрихи Швейтсария воқеъ аст. Маҳсулоти ширкати мазкур дорои стандарти байналмилалӣ мебошад.

Истгоҳи конвертории Сангтӯда – бузургтарин ва нахустин истгоҳи конверторӣ дар Осиёи Марказӣ барои интиқоли неруи барқи ҷараёни доимӣ ба Ҷумҳурии Исломии Покистон дар доираи Лоиҳаи CASA – 1000 бо маблағгузории Бонки ҷаҳонӣ сохта шуда ва ҳамакнун омодаи фаъолият аст.

Dialog.tj

Хатти хабарҳо

18.11.2026 17:37

Бонки ҷаҳонӣ: камбуди об ва фишори иқтисодӣ зиндагии миллионҳо сокини Афғонистонро душвор кардааст

Бонки ҷаҳонӣ дар изҳороти нави худ ҳушдор дод, бо вуҷуди пешбинии рушди иқтисодии Афғонистон дар соли 2026, коҳиши даромади аҳолӣ, афзоши нахи маводи ғизоӣ ва камбуди об вазъияти зиндагии миллионҳо сокини Афғонистонро душвор кардааст.
18.11.2026 17:28

Сафири Тоҷикистон бо намояндаи Толибон масъалаи таъсиси бозор дар марзи Тоҷикистон ва Афғонистонро баррасӣ кард

Саъдӣ Шарифӣ, сафири Ҷумҳурии Тоҷикистон дар Кобул дар мулоқот бо раиси Палатаи тиҷорат ва сармоягузории ҳукумати гурӯҳи террористии Толибон дар Афғонистон Сайид Карим Ҳошимӣ масъалаи таъсиси бозори муштрак дар минтақаи марзии ду кишвар ва густариши ҳамкориҳои иқтисодиро баррасӣ кардаанд.
18.11.2026 14:21

Ёсин Зиё ба Ҳайбатуллоҳ: “Мо барои курсӣ намеҷангем, барои озодӣ меҷангем”

Роҳбари Ҷабҳаи озодии Афғонистон дар вокуниш ба изҳороти ахири роҳбари гурӯҳи террористии Толибон Мулло Ҳайбаттулоҳ гуфт, ки пешниҳоди Ҳайбатуллоҳ Охунзода дар хусуси ҷалби мухолифон ба сохтори ҳукумат наметавонад онҳоро аз мубориза бар зидди Толибон боз дорад.
18.11.2026 14:09

Талаби 55 сол ҳабс: Ҷузъиёти парвандаи Мансур Манучеҳрӣ аз сӯи Вазорати адлияи Амрико нашр шуд

Вазорати адлияи Иёлоти Муттаҳидаи Амрико ҷузъиёти шаҳрванди Тоҷикистон Мансур Манучеҳриро нашр кард. Ӯ ба иттиҳоми ҳамкорӣ ва маблагузаронӣ ба ДОИШ як сол қабл боздошт шуда буд.
18.11.2026 13:17

Муовини вазири дифои Русия аз Пойгоҳи низомии 201 дар Тоҷикистон боздид кард

Муовини вазири дифои Русия, генерал-лейтенант Павел Фрадков дар ҷараёни сафари корӣ ба Тоҷикистон аз Пойгоҳи низомии 201-уми ин кишвар боздид карда, ба анҷоми сохтмони як қатор иншооти низомию иҷтимоӣ дастур додааст.
18.11.2026 13:13

Самтҳои афзалиятноки ҳамкории Тоҷикистон ва UNCCD муҳокима шуданд

Раиси Кумитаи ҳифзи муҳити зисти назди Ҳукумати Ҷумҳурии Тоҷикистон Баҳодур Шерализода бо котиби иҷроияи Конвенсияи СММ оид ба мубориза бо биёбоншавӣ (UNCCD) Ясмин Фуад мулоқот намуд.
18.11.2026 12:12

Дурнамои ҳамкории Тоҷикистон ва Амрико дар дидори Сарвари давлат бо Кристофер Ландау баррасӣ гардид

Имрӯз, 18-уми ноябр Президенти Ҷумҳурии Тоҷикистон, Пешвои миллат, муҳтарам Эмомалӣ Раҳмон муовини Котиби давлатии Иёлоти Муттаҳидаи Амрико Кристофер Ландауро ба ҳузур пазируфтанд.
18.11.2026 10:38

“Тарс аз Эрон”. Мақомоти амрикоӣ аз тарси Эрон ба паноҳгоҳҳо мераванд

Дар тӯли як ҳафтаи ахир лаҳни гуфтори мақомоти Эрону Амрико тағйир карда ва онҳо ҳамдигарро ба ҳамлаи мутақобил таҳдид мекунанд. Амрико аз тарси ҳамлаи Эрон ба мақомоти олирутбааш онҳоро дар маконҳои муҳофизатшуда ҷо дода ва иддао мекунад, ки Эрон дар пайи террори мақомоти амрикоӣ ва ҳамлаи, ҳатто кимиёӣ ба Амрико аст.