Хабаргузории Ройтерз менависад, ки Русия аз моҳи августи соли ҷорӣ содироти сӯзишвории дизелӣ ба Тоҷикистонро ба таври назаррас афзоиш додааст.

Ройтерз ин гузориши худро бо такя ба иттилои тоҷирони нафт нашр кардааст.

Бар асоси ин гузориш, ҳаҷми интиқоли сӯзишвории дизелӣ аз Русия ба Тоҷикистон дар моҳи август ба беш аз 56 ҳазор тонна расидааст. Дар моҳи июл ин нишондиҳанда тақрибан 16 ҳазор тонна гуфта мешавад.

Афзоиши содироти сӯзишвории Русия дар ҳолест, ки ин кишвар содироти сӯзишворӣ ба бозорҳои хориҷиро маҳдуд кардааст. Русия маҳдудияти содироти сӯзишвориро барои нигоҳ доштани захираҳои дохилӣ ва пешгирӣ аз афзоиши нархи сӯзишворӣ ҷорӣ карда буд.

Ба навиштаи Ройтерз ҳамлаҳои паҳподҳои Украина ба корхонаҳои кокарди нафти Русия боиси коҳиши истеҳсол ва норасоии сӯзишворӣ дар баъзе минтақаҳои ин кишвар шудаанд.

“Бо вуҷуди ин, дар моҳи август содироти дизели Русия ба Тоҷикистон, Қазоқистон, Қирғизистон ва Муғулистон, дар маҷмуъ ба беш аз 370 ҳазор тонна расида, нисбат ба моҳи июл ду баробар афзоиш ёфтааст” - манависад Ройтерз.

Дар ин гузориш зикр мешавад, ки дар миёни харидорони сӯзишвории дизели Русия Муғулистон дар ҷойи аввал қарор дорад.

Русия дар маҷмуъ аз моҳи январ то августи соли ҷорӣ ба кишварҳои Осиёи Марказӣ ва Афғонистон тақрибан 2, 5 миллион тонна сӯзишворӣ содир намудааст. Ин рақам нисбат ба ҳамин давраи соли 2025, ки 2, 6 миллион тонна буд, камтар мебошад.

Dialog.tj