Тоҷикистон ва Ӯзбекистон тақвияти ҳамкориҳои саноатӣ, таъсиси корхонаҳои муштарак ва афзоиши маҳсулоти арзишмандро баррасӣ намуданд.

Дар ин бора “Интерфакс” рӯзи 13-уми ноябр хабар дода, навишт, ки дар мулоқоти Азиз Назар, муовини якуми Вазири саноат ва технологияҳои нави Тоҷикисон бо Фирӯза Ҳамидова, вазири саноати кӯҳӣ ва геологияи Ӯзбекистон масъалаҳои зикршуда мавриди баррасӣ қарор гирифт.

Тибқи иттилоъ, намояндагони ду кишвар зарурати иҷрои саривақтӣ ва босамари барномаи ҳамкориҳои саноатии байниҳукуматиро таъкид намуданд. Ду ҷониб дар бораи густариши робитаҳои истеҳсолӣ дар соҳаҳои афзалиятнок, таъсиси корхонаҳои муштарак ва коркарди ашёи хом гуфтугӯ карданд.

Роҳҳои истифодаи самараноки захираҳои табиӣ ва имкониятҳои истеҳсолии ду кишвар дар меҳвари гуфтугӯи ду ҷониб қарор гирифт ва ҳамчунин, таъкид шуд, ки ду кишвар аз таҷрибаҳои худ дар соҳаи саноат истифода кунанд.

Тибқи маълумоти Кумитаи миллии омори Ӯзбекистон то 1-уми феврали соли 2026 дар ин кишвар 410 корхона бо иштироки сармояи Тоҷикистон фаъолият мекард. Аз ин шумора 102 корхона муштарак буда, 308 ширкати дигар пурра ба сармояи Тоҷикистон тааллуқ доштанд.

Дар Тоҷикистон низ корхонаҳои дорои сармояи Ӯзбекистон фаъолият доранд. Бар асоси маълумоти дар соли 2026 нашршуда, шумораи онҳо ба 131 адад мерасид.

Тавсеаи ҳамкориҳои саноатӣ дар пасманзари афзоиши робитаҳои тиҷоративу иқтисодии ду кишвар сурат мегирад. Душанбе ва Тошканд дар солҳои охир мубодилаи тиҷоратиро афзоиш дода, барои ҷалби сармоя ва татбиқи тарҳҳои муштараки иқтисодӣ талош мекунанд.

Комиссияи байниҳукуматӣ оид ба ҳамкориҳои тиҷоративу иқтисодӣ низ яке аз механизмҳои муҳимми ҳамоҳангсозии ин раванд ба шумор меравад. Дар доираи фаъолияти он масъалаҳои рушди савдои дуҷониба, сармоягузорӣ ва ҳамкориҳои истеҳсолӣ баррасӣ мешаванд.

Dialog.tj