12-уми ноябр дар Маскав Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ва президенти Федератсияи Русия Владимир Путин мулоқоти корӣ анҷом доданд.

Хадамоти матбуоти Сарвари давлат навиштааст, ки дар рафти гуфтугӯ ҷонибҳо доираи васеи масъалаҳои дуҷониба ва бисёрҷонибаро дар рӯҳияи ҳамдигарфаҳмӣ ва эътимоди комил баррасӣ карданд.

Ба навиштаи манбаъ, дар мулоқот мубодилаи афкор оид ба таъмини амният ва субот дар минтақа сурат гирифт.

Гуфта мешавад, ки алоқамандии ҳар ду ҷониб ба густариши робитаҳои тиҷоратӣ-иқтисодӣ ва гуногунҷанба сохтани сохтори гардиши молу маҳсулот тасдиқ карда шуд.

“Ҷонибҳо зарфиятҳои фаровони чунин ҳамкориро дар соҳаҳои энергетика, саноат, кишоварзӣ ва инфрасохтори нақлиётию логистикӣ ва коммуналӣ таъкид намуданд. Имкониятҳои нави рушди ҳамкорӣ дар самтҳои рақамикунонӣ, зеҳни сунъӣ, хизматрасониҳои электронии давлатӣ ва амнияти киберӣ таъкид гардид. Дар бахшҳои гуманитарӣ ба масъалаҳои маориф, илм ва фарҳанг таваҷҷуҳ зоҳир карда шуд”, - навиштааст манбаъ.

Таъкид мегардад, ки сарони давлатҳо ҳамчунин ҷанбаҳои мушаххаси ҳамкорӣ дар соҳаи муҳоҷирати меҳнатиро баррасӣ намуданд.

Dialog.tj