Луис Инасиу Лула да Силва, раиси ҷумҳури Бразилия, дар вокуниш ба иқдомҳои нави Вашингтон алайҳи кишвараш таъкид кардааст, ки Бразилия ба Амрико имтиёз нахоҳад дод ва аз ҳокимияти иқтисодӣ ва сиёсии худ дифоъ хоҳад кард.

Ба гузориши расонаҳои ҷаҳонӣ Лула субҳи ҷумъа дар шабакаи иҷтимоии “Х” навиштааст: “Бразилия бидуни ҳеч шак барои ҳокимияти худ мубориза хоҳад кард”.

Ин изҳорот пас аз он матраҳ шуд, ки Намояндагии тиҷоратии Амрико (USTR) пас аз як соли таҳқиқ дар бораи ончи Вашингтон “равишҳои тиҷории ноодилона”-и Бразилия мехонад, эълом кард, ки аз 22-уми июл барои бахше аз воридоти Бразилия тарифи 25-дарсадӣ ҷорӣ хоҳад кард.

Ҳамзамон, Марко Рубио, вазири хориҷаи Амрико, дар шабакаи иҷтимоии “Х” иддао кард, ки Лула да Силва ва давлати ӯ дар музокирот бо Вашингтон “бо ҳусни ният” амал накардаанд.

Рубио зимни интиқод аз сиёсатҳои иқтисодии Бразилия иддао кард, ки “сиёсатҳои иқтисодии Лула ҳам ба зиёни амрикоиҳо ва ҳам ба зиёни мардуми Бразилия аст ва ӯ дар як соли гузашта манфиатҳои мардуми Бразилияро фидои мавзеъгириҳои шахсии худ кардааст. Ин тарифа баҳои он аст”.

Пеш аз ин Доналд Трамп, раиси ҷумҳури Амрико, пешниҳоди ҷорӣ кардани тарифи 50-дарсадӣ бар молҳои Бразилияро матраҳ карда буд, аммо баъдан аз он сарфи назар кард.

Ӯ ҳамчунин, Бразилияро ба нақзи ҳуқуқи башар муттаҳам карда ва ҳушдор дода буд, ки дар сурати идомаи муҳокимаи Жаир Болсонару, раиси ҷумҳури пешини Бразилия, алайҳи ин кишвар иқдомҳои иқтисодии бештареро рӯйи даст хоҳад гирифт.

Дар ҳамин ҳол, шабакаи “CNN” бо истинод ба оморҳои тиҷоратии Амрико гузориш додааст, ки ҳарчанд банди 301-и Қонуни тиҷорати Амрико маъмулан алайҳи кишварҳое истифода мешавад, ки бо Иёлоти Муттаҳида моҷарои бузурги тиҷоратӣ доранд, Вашингтон соли гузашта дар тиҷорати молҳо бо Бразилия 14,4 миллиард доллар равобити тиҷоратӣ доштааст, ки нисбат ба соли пеш аз он 112,8 дарсад афзоишро нишон медиҳад.

Dialog.tj