Вазорати корҳои хориҷии Федератсияи Русия бо пахши як изҳорот гуфт, ки иттиҳоми Бенямин Нетаняҳу дар мавриди нақш доштани Русия дар роҳандозии маъракаи интернетии зиддияҳудӣ беасос аст. Ин вазорат матраҳ шудани чунин иттиҳомро ба интихоботи Исроил, ки рӯзи 27-уми октябр бояд баргузор шавад, вобаста донист.

Вазорати корҳои хориҷии Русия гуфт, ки дар бораи ин иттиҳом сарвазири Исроил ҳеч далел пешниҳод накардааст. Вазорат аз он изҳори таассуф кард, ки ин масъала дар остонаи интихобот ба ҷойи гуфтугӯ миёни коршиносони амнияти киберии ду ҷониб, дар расонаҳо матраҳ шудааст.

Дар изҳороти Вазорати корҳои хориҷии Русия омадааст, Бенямин Нетаняҳу иддао кардааст, ки Маскав бо таъсиси шабакаи ботӣ дар интернет маъракаи зиддияҳудиро ба роҳ мондааст ва эҳсосоти зидди Исроилро дар кишварҳои ғарбӣ тақвият додааст.

Русия дар изҳороти худ зикр кардааст, дар соли 2018 ба Исроил пешниҳод кардааст, ки мақомоти ду кишвар барои ҳамкорӣ дар соҳаи амнияти иттилоотӣ созишномаи дуҷонибаро имзо намоянд. Исроил ба ин пешниҳод посух надодааст. Вазорат гуфтааст, чунин ҳамкорӣ метавонист аз ба миён омадани мушкилоти беасос пешгирӣ кунад.

Вазорати корҳои хориҷии Русия ин иттиҳомро дар доираи нашри хабарҳои гумроҳкунанда баррасӣ карда, гуфтааст, ки он ба мисли иддаоҳои қаблии дахолати хакерҳои рус ба интихоботи Амрико аст. Маскав он вақт иттиҳомҳои Ҳилларӣ Клинтонро “дурӯғи бузург” номида буд.

Вазорати корҳои хориҷии Русия гуфтааст, ки нигоҳи ҷомеаи ҷаҳонӣ ба Исроил фақат аз рӯи амалкард ва сиёсати ин кишвар ташаккул меёбад.

Dialog.tj