Анвар Иброҳим, нахуствазири Малайзия, рӯзи чоршанбе эълом кард, ҳар шаҳрванди Исроил, ки дар ин кишвар шиносоӣ шавад, фавран ихроҷ хоҳад шуд. Ин изҳорот ҳамзамон бо баррасии иддаоҳо дар бораи иштироки як шаҳрванди исроилӣ дар фаъолиятҳои як маҷмааи иқоматӣ дар иёлати ҷанубии Ҷуҳур баён шудааст.

Ба гузориши хабаргузории “Анадолӣ”, нахуствазири Малайзия гуфтааст, ки ниҳодҳои марбута иддаоҳои вобаста ба даст доштани як шаҳрванди исроилӣ дар фаъолиятҳои як маҷмааи хусусии иқоматиро дар Ҷуҳур таҳқиқ мекунанд. Ӯ афзуд, ки агар дурустии ин иддаоҳо таъйид шавад, давлат ҳеч гуна нармиш нишон нахоҳад дод.

Анвар Иброҳим таъкид кардааст: “Агар ҳар шаҳрванди Исроилро пайдо кунем, фавран ӯро ихроҷ хоҳем кард, зеро Малайзия Исроилро ба расмият намешиносад”.

Малайзия аз ҷумлаи кишварҳое аст, ки Исроилро ба расмият намешиносад ва дорандагони гузарномаи исроилӣ ба таври умум, бидуни дарёфти асноди махсус, ҳаққи вуруд ба ин кишварро надоранд.

Ин таҳқиқот пас аз он оғоз шуд, ки давлати иёлати Ҷуҳур хостори анҷоми таҳқиқоти федералӣ дар бораи марказе бо номи “Нетворк Скул” (Network School) гардид. Ин марказ як маҷмааи хусусии иқоматӣ ва омӯзишӣ буда, дар минтақаи “Форест Ситӣ”-и иёлати Ҷуҳур фаъолият мекунад.

Вазорати корҳои дохилии Малайзия таҳқиқоти худро оғоз кардааст. Идораи муҳоҷирати ин кишвар низ рӯзи чоршанбе эълом намуд, ки баррасии вазъи 266 шаҳрванди хориҷӣ дар ин маҷмаа нишон медиҳад, ки ҳамаи онҳо дорои санадҳои қонунии муҳоҷиратӣ мебошанд, аммо таҳқиқот дар бораи иддаоҳои матраҳшуда ҳамоно идома дорад.

Бар асоси гузориши “Ченнел Нюс Эйша” (Channel News Asia), “Нетворк Скул” худро як маҷмааи хусусии иқоматӣ ва омӯзишӣ барои корофаринони фанноварӣ, бунёнгузорони стартапҳо, барноманависон ва коргарони фосилавӣ муаррифӣ мекунад.

Ин маҷмаа дар рӯзҳои ахир пас аз интишори иддаоҳо дар шабакаҳои иҷтимоӣ дар бораи ҳузури шаҳрвандони исроилӣ дар барномаҳои он бо истифода аз гузарномаҳои кишвари дувум, дар меҳвари таваҷҷуҳи расонаҳо қарор гирифтааст.

Dialog.tj