20-уми май Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон, Дабири кулли Созмони Амният ва Ҳамкории Аврупо (САҲА) Фаридун Синирлиоғлуро ба ҳузур пазируфтанд.

Бинобар иттилои хадамоти матбуоти Сарвари давлат, дар мулоқот вазъи кунунӣ ва дурнамои ҳамкории Тоҷикистон бо ин созмони байналмилалӣ баррасӣ шуд.

Иттилоъ дода мешавад, ки дар вохӯрӣ таваҷҷуҳ ба ҳамкории дуҷониба дар ҳар се самти асосии кори Созмон ҷанбаҳои низомӣ-сиёсӣ, иқтисодӣ-экологӣ ва инсонӣ равона карда шуд.

Зимни мулоқот Сарвари давлат таъкид доштанд, ки "мо кӯшиш мекунем то барномаҳо ва лоиҳаҳои дар Тоҷикистон амалишаванда ба ниёзҳои воқеии мардуми мо ҷавобгӯ бошанд".

Манбаъ меафзояд, ки татбиқи лоиҳаҳо оид ба пешгирӣ аз ҷиноятҳои киберӣ, мубориза бо гардиши ғайриқонунии маводи мухаддир, такмили расмиёти гумрукӣ ва мубодилаи иттилоот ҳамчун аз авлавиятҳо номида шуданд.

Гуфта мешавад, ки ҷонибҳо ба омодагӣ ба ду конфронси байналмилалӣ оид ба масъалаҳои ҷаҳонии об ва мубориза бо терроризм ва маблағгузории он ки мутаносибан дар моҳҳои май ва июни соли ҷорӣ дар Душанбе ва Ню-Йорк баргузор мешаванд, таваҷҷуҳи хос зоҳир карданд.

Ҳамчунин, доир ба ҳамкорӣ дар соҳаҳои ҳифзи ҳуқуқи инсон, такмили низоми интихоботӣ, таъмини баробарии гендерӣ, пешгирии зӯроварии хонаводагӣ, мубориза бо савдои инсон, рушди сиёсати ҷавонон ва таҳкими иқтидори воситаҳои ахбори омма гуфтугӯ сурат гирифт.

Dialog.tj