Тоҷикистон ва Кувайт дар нақша доранд, ки ширкати ҳавоии муштаракро роҳандозӣ кунанд. Гуфта мешавад, ки барои амалӣ намудани лоиҳаи муштарак сармоягузории асосиро Кувайт анҷом хоҳад дод.

Ҳафтаи гузашта чорумин ҷаласаи комиссияи байниҳукуматӣ оид ба ҳамкориҳои тиҷоратию иқтисодии Тоҷикистон ва Кувайт баргузор гардид.

Ҷаласаи муштараки иқтисодӣ-тиҷоратӣ миёни Тоҷикистон ва Кувайт зери раҳбарии Завқӣ Завқизода, вазири рушди иқтисод ва савдои Тоҷикистон ва вазири молияи Кувайт хонум Нура Сулаймон Ал-Фассам доир гашт. Дар робита ба ин Вазорати рушди иқтисод ва савдои Тоҷикистон хабар додааст.

Ду тараф нақшаи роҳ барои густариши робитаҳои тиҷоративу иқтисодиро баррасӣ карданд.

Ҷониби Тоҷикистон таъкид кард, ки сармоягузории Кувайт ба коркарди маҳсулоти кишоварзӣ, истеҳсоли нассоҷӣ, нақлиёт ва сайёҳӣ ҷалб карда шавад.

Ҳамчунин, пешниҳод гардид, ки таъсиси фонди муштараки сармоягузории Тоҷикистон ва Кувайт дар робита ба иҷрои лоиҳаҳои бузург таъсис дода шавад.

Дар ҷаласаи зикршуда ҷониби Тоҷикистон пешниҳод намуд, ки инфрасохтори авиатсионӣ навсозӣ ва як ширкати муштараки ҳавоӣ бо сармоягузории Кувайт ташкил карда шавад.

Дар ҷараёни музокироти дуҷониба масъалаи ба роҳ мондани парвозҳои мустақими ширкати кувайтии “Kwait Airwaes” баррасӣ гардид.

Ёдовар мешавем, ки Фонди кувайтии Рушди иқтисодиёти араб барои амалӣ намудани лоиҳаҳо дар бахшҳои нақлиёт, энергетика ва обёрии Тоҷикистон беш аз 200 миллион доллар ҷудо кардааст.

Дар поёни ҷаласаи ҳамкориҳои иқтисодӣ ва тиҷоратӣ ҷонибҳо протоколи ҳамкорӣ барои таҳкими минбаъдаи робитаҳои иқтисодиву тиҷоратиро имзо намуданд.

Dialog.tj