Намояндагони дипломатии Тоҷикистон дар суҳбат бо мақомоти соҳаи маорифи Эрон масъалаи ҳалли мушкилоти ҳуқуқӣ, таъсисдиҳӣ ва ифтитоҳи “Мадрасаи Рӯдакӣ”-ро баррасӣ намуданд.

Вазири маориф (омӯзиш ва парвариш)-и Эрон Алиризо Козимӣ зимни суҳбат бо сафири Тоҷикистон дар Эрон Низомиддин Зоҳидӣ ба мушкилоти эҷоди “Мадрасаи Рӯдакӣ” дар Тоҷикистон ишора намуда, таъкид кард, ки ҳар ду кишвар барои ҳалли он бояд кумитаи муштарак ташкил намоянд.

“Кумитаи муштарак шомили муовинҳои ҳуқуқӣ, навсозӣ ва маркази байналмилалии вазорати маориф бо намояндагони Тоҷикистон дар ин замина бояд ташкил шавад ва ҳар чӣ зудтар мушкилоти мадраса бо тафоҳум ва ҳамкорӣ ҳал карда шавад” – пешниҳод намуд Алиризо Козимӣ, вазири маорифи Эрон дар суҳбат.

Алиризо Козимӣ дар суҳбат бо Низомиддин Зоҳидӣ ҳамчунин, таъкид кард, ки Эрон ба ҳама донишомӯзони тоҷик, ки дар Эрон зиндагӣ мекунанд, хизматрасонии омӯзишӣ фароҳам меорад ва мушкилоти ҷойдошта дар ин замина бартараф карда мешавад.

Низомиддин Зоҳидӣ таъкид кард, ки соҳаи маориф дар ҷомеа нақши муҳим дорад ва кишварҳое муваффақ ҳастанд, ки маорифи муваффақ доранд.

“Дар солҳои истиқлол Тоҷикистон бо Эрон ҳамкории хуб дорад ва санадҳои арзандае миёни Вазорати маориф ва илми Тоҷикистон бо Вазорати омӯзиш ва парвариши (маорифи) Эрон имзо шудааст. Ҳамчунин, дар қолаби коммисияи муштараки иқтисодӣ ва тиҷоратӣ низ масъалаҳои марбут ба омӯзиш ва парвариш яке аз меҳварҳои муҳим будааст” – таъкид кард Низомиддин Зоҳидӣ.

Сафири Тоҷикистон дар суҳбат бо вазири маориф (омӯзиш ва парвариш)-и Эрон ба мушкилоти роҳандозӣ ва созмондиҳии “Мадрасаи Рӯдакӣ” дар Тоҷикистон ишора намуда, пешниҳод кард, ки “Эҷод ва роҳандозии Мадрасаи Рӯдакӣ дар се ҳавза: моликият, муҳтавои китоби дарсӣ ва мудирият бо проблемаҳое рӯ ба рӯ аст ва тақозо мекунем, ки ин масъала бартараф ва ҳарчӣ сареътар ифтитоҳ шавад.

Тибқи санади имзошуда “Мадрасаи Рӯдакӣ” аз тарафи Эрон бояд дар Тоҷикистон сохта шавад. Ҳар ду кишвар дар ин замина тафоҳумномаро имзо кардаанд. “Мадрасаи Рӯдакӣ” тарҳи муштараки Эрон ва Тоҷикистон мебошад.

Dialog.tj