Таҳти унвони “Рақс моро муттаҳид мекунад” шоми 12-уми ноябр дар Театри  давлатии опера ва балети ба номи Садриддин Айнӣ бо иштироки намояндагони Тоҷикистон, Ӯзбекистон, Қазоқистон, Русия ва Молдава фестивали рақс баргузор гардид.

Дар Фестивал ансамбилҳои рақсии кишварҳои номбурда ва мақомоти марбута иштирок намуданд.

Фестивал бо барномаи “Нақорабазм”-и ансамбили рақсии “Зебо” баргузор гардид.

Дар анҷоми қисмати расмӣ дастаҳои рақсии “Гулрез”, “Ҷаҳоноро”, “Навои Бадахшон”, “Базморо”, “Парасту”, “Чаман”, “Лола” ва дастаҳои рақсии вилояти Суғду Хатлон навъҳои мухталифи рақси миллӣ, аз ҷумла “Зарафшон”, “Рақси табақ”, “Рапо”, “Рақс бо қошуқ” – ро иҷро намуданд.

Дастаҳои рақсии “Баҳор”-и Ӯзбекистон, “Салтанат” аз Қазоқистон, “Берёзка” аз Русия ва “Флуйешраш” аз Молдава рақсҳои миллии худро иҷро намуданд.

Бар асоси иттилои Мирзоолим Саидов, Сардори раёсати санъати Вазорати фарҳанги Ҷумҳурии Тоҷикистон фестивали рақс бори дувум аст, ки баргузор мегардад. Ӯ таъкид мекунад, ки “Баргузории фестивали байналмилалии “Рақс моро муттаҳид мекунад” барои табодули таҷрибаи гурӯҳҳои ҳунарии рақсии кишварҳо муҳим буда, баҳри муаррифии рақси миллии тоҷикӣ мусоидат менамояд”.

Ансамбили рақсии “Зебо” бо иҷрои барномаи рақсӣ зери оҳанги “Эй санам” фестивалро ҳусни анҷом бахшид.

Dialog.tj