Вазорати молияи Иёлоти Муттаҳидаи Амрико шаҳрванди Тоҷикистон ва Русия Алишер Домуллоҷоновро ба рӯйхати таҳримҳои марбут ба Эрон ворид кардааст. Иёлоти Муттаҳидаи Амрико ӯро ба дастгирии шабакаи интиқоли нафти Эрон муттаҳам мекунад.

Дар ин бора хабаргузории «ТАСС»-и Русия бо такя ба изҳороти Вазорати молияи Иёлоти Муттаҳидаи Амрико хабар дода, афзуд, ки  ҳамроҳи ӯ боз чаҳор шаҳрванди Ҳиндустон ва 10 ширкату созмон аз Ҳиндустон, Туркия ва Сингапур низ ба рӯйхати таҳримҳои Иёлоти Муттаҳидаи Амрико ворид шудаанд.

Мақомоти Иёлоти Муттаҳидаи Амрико мегӯянд, ки афрод ва ширкатҳои таҳримшуда ба фаъолияти шабакаи пинҳонии интиқоли нафти Эрон мусоидат кардаанд. Мақомоти амрикоӣ мегӯянд, ки ин афрод барои киштиҳое, ки таҳти таҳрим қарор доранд ва ба интиқоли нафти Эрон машғуланд, парчамҳои қалбакӣ ва ҳуҷҷатҳои сохта омода мекарданд. Гуфта мешавад, ки бархе аз ин киштиҳо бо номи неруҳои мусаллаҳи Эрон фаъолият доштаанд.

Дар изҳороти Вазорати молияи ИМА зикр мешавад, ки бархе аз ин афрод ва ширкатҳои таҳримшуда ба бахши ҳавонавардии Эрон низ кумак кардаанд. Вазорати молияи ИМА дар як огоҳиномаи дигар ширкатҳоро аз хатарҳои ҳамкорӣ бо киштиҳое, ки бо парчамҳои қалбакӣ ҳаракат мекунанд, ҳушдор додааст. Мақомоти амрикоӣ гуфтаанд, чунин киштиҳо метавонанд бе суғурта ва ҳуҷҷатҳои зарурӣ фаъолият кунанд ва дар сурати рӯй додани ҳодиса ба кишварҳое, ки дар ҳудуди онҳо фаъолият доранд, хисороти чандмиллиарддолларӣ расонанд.

Иқдоми таҳрими шаҳрванди Тоҷикистон ба иттиҳоми ҳамкорӣ бо Эрон аз ҷониби Иёлоти Муттаҳидаи Амрико дар ҳоле сурат мегирад, ки ин кишвар фишорҳои иқтисодӣ бар Эронро идома медиҳад.

Dialog.tj