Фуррах Ҳамрализода, муовини аввали Вазири корҳои хориҷии Ҷумҳурии Тоҷикистон гуфт, таъмини амнияти Авруосиё бидуни ҳамкории муштараки кишварҳову созмонҳои байналмилалӣ имконнопазир мебошад.

Фаррух Ҳамрализода рӯзи 3-юми ноябр дар ҷараёни суханронӣ дар Конфронси чоруми байналмилалии Минкс оид ба амнияти Авруосиё ин нуктаро таъкид намуд.

Дар ин бора хабаргузории давлатии Беларусия “БелТа” гузориш дода, ба нақл аз Фаррух Ҳамрализода навишт, ки вазъияти байналмилалӣ дар пасманзари тағйироти босуръати сиёсиву технологӣ, коҳиши эътимод байни давлатҳо ва заиф шудани пойбандӣ ба ҳуқуқи байналмилалӣ ҳар чи бештар номуайян ва пешгӯинашаванда мешавад.

Тибқи гуфтаи ӯ, Ҷумҳурии Тоҷикистон дар  шароити афзоиши танишҳо дар ҷаҳон ҷонибдори сулҳу субот аст ва таҳкими робитаҳои байналмилалиро барои таъмини амният зарур медонад.

Фаррух Ҳамрализода, муовини аввали Вазири корҳои хориҷии Ҷумҳурии Тоҷикистон ҳамчунин, ба нақши Афғонистон дар амнияти минтақаи Авруосиё ишора намуда, гуфт, ки Тоҷикистон барои пешгирӣ ва муқовимат ба таҳдидҳои эҳтимолӣ иқдом хоҳад кард.

Ӯ таъкид кард, ки терроризм, ифротгароии хушунатомез, ҷиноятҳои киберӣ, қочоқи маводи мухаддир ва интиқоли ғайриқонунии силоҳ таҳдидҳои муҳимми фаромарзӣ ба шумор мераванд.

Фаррух Ҳамаризода ҳамчунин, аз равандҳои босуръат ва баъзан харобиовар дар фазои иттилоотӣ изҳори нигаронӣ карда, таъкид намудааст, ки муқовимат ба хатарҳои муосир танҳо бо талошҳои муштараки давлатҳо самарабахш буда метавонад.

Ба гуфтаи ӯ, Тоҷикистон барои рушди ҳамкориҳои байналмилалӣ дар ин самт фаъолона талош мекунад. Дар ин замина, “Раванди Душанбе” оид ба мубориза бо терроризм ва маблағгузории он ҳамчун яке аз платформаҳои ҳамоҳангсозии талошҳои давлатҳо, созмонҳои байналмилалӣ ва ҷомеаи коршиносон арзёбӣ шудааст.

Муовини аввали вазири корҳои хориҷии Тоҷикистон дар поёни суханронии худ аз Беларус барои ташкили конфронс изҳори сипос кардааст.

Dialog.tj