Илон Маск, миллиардери амрикоӣ ва соҳиби шабакаи иҷтимоии “Икс” (X), ки бо харҷи садҳо миллион доллар аз Ҳизби ҷумҳурихоҳ дар интихоботи миёндавраии ИМА ҳимоят карда буд, пас аз нокомии интихоботии ин ҳизб бо нашри паёми кинояомез дар шабакаи иҷтимоии “X” вокуниш нишон дод.

Расонаҳои Амрико менависанд, ки Илон Маск барои дастгирии номзадҳои ҷумҳурихоҳ дар интихоботи миёндавраии ИМА тақрибан 250 миллион доллар харҷ карда буд. Аммо пас аз нокомии интихоботии ин ҳизб ва пешсафии демократҳо дар Конгресс, ӯ бо лаҳни кинояомез навишт: “Лазерҳои кайҳонӣ кор накарданд!”

Маск дар паёми худ дар шабакаи иҷтимоии “X” бо ишора ба иддаоҳои марбут ба дахолати лазерҳои кайҳонӣ ба интихобот, шикасти ҷумҳурихоҳонро ба таври ҳаҷвӣ шарҳ дод.

Ӯ ҳамчунин, дар паёми дигар навишт: “Акнун ба назар мерасад, ки таъсиси марказҳои маълумотӣ дар фазои кайҳонӣ ҷолибтар шудааст!”

Ин вокуниш дар ҳоле садо дод, ки Маск дар ҷараёни рақобатҳои интихоботии ИМА ба яке аз бузургтарин сарпарастони молии ҷумҳурихоҳон табдил ёфта буд. Бино ба гузориши шабакаи “NBC”, ӯ барои маъракаҳои интихоботии ин ҳизб тақрибан 250 миллион доллар харҷ кардааст.

Изҳороти Маск чанде пас аз суханронии Ҷеймс Таларико, номзади пирӯз аз Ҳизби демократ дар интихоботи Сенат аз иёлати Техас, садо дод. Таларико зимни суханронӣ ба муносибати пирӯзӣ бо ишора ба хароҷоти ҳангуфти таблиғотии рақибонаш гуфт, ки маъракаи интихоботии ӯ бо харҷи беш аз 300 миллион доллар, таблиғоти манфӣ, маъракаҳои бадномсозӣ, ҳисобҳои қалбакии хориҷӣ ва тасвирҳои сохтаи ҳуши маснуӣ рӯ ба рӯ шудааст.

Ин сиёсатмадори демократ ҳамчунин, миллиардерҳоеро, ки молик ва идоракунандаи алгоритмҳои шабакаҳои иҷтимоӣ мебошанд, интиқод карда, махсусан аз Маск ном бурд. Ӯ шеваи сиёсатварзии Доналд Трампро ба майдони бадномсозӣ, сару садо ва намоишкорӣ ташбеҳ дод.

Бино ба гузориши шабакаи “NBC”, натиҷаҳои интихоботи миёндавраӣ ва пирӯзии демократҳо дар ҳар ду палатаи Конгресс мавқеи ин ҳизбро барои муқовимат бо барномаи қонунгузории Трамп тақвият бахшидааст. Ҳамзамон, нигарониҳо дар бораи таъсири ин тағйироти тавозуни сиёсӣ ба ояндаи сиёсати технологӣ, ҳуши маснуӣ ва сармоягузорӣ ба марказҳои маълумотӣ афзоиш ёфтаанд. Бозорҳои фючерсии саҳомӣ низ пас аз эълони натиҷаҳои интихобот коҳишро таҷриба кардаанд.

Dialog.tj