Дар шаҳри Душанбе рӯзи 5-уми сентябр Фестивали ҳуши маснуъӣ, навоварӣ ва технологияҳои рақамӣ доир мегардад. Дар он ширкатҳои технологӣ, донишгоҳҳо ва муассисаҳои таълимии соҳаи технологияҳои иттилоотӣ ширкат хоҳанд кард.

Фестивал бо номи «Гузаргоҳи зеҳни сунъӣ» (AI ALLEY) дар боғи «Куруши Кабир» баргузор мешавад. Барномаи чорабинӣ аз соати 17:00 то 22:00 идома мекунад. Ташкилкунандаи фестивал Агентии инноватсия ва технологияҳои рақамии назди Президенти Тоҷикистон аст. Ба гуфтаи ташкилкунандагон, ҳадафи асосии фестивал муаррифии имкониятҳои зеҳни сунъӣ ва нишон додани истифодаи амалии технологияҳои рақамӣ барои сокинон мебошад.

Дар ин чорабинӣ ширкатҳои технологӣ, донишгоҳҳо, мактабҳои махсус ва таҳиягарон лоиҳаҳо ва таҷрибаи худро дар истифодаи зеҳни сунъӣ пешниҳод мекунанд. Меҳмонон метавонанд аз намоишгоҳҳо боздид карда, дар семинарҳои омӯзишӣ, озмунҳо ва барномаҳои интерактивӣ иштирок кунанд.

Барномаи фестивал ба чаҳор бахши асосӣ тақсим шудааст. Дар саҳнаи асосӣ маросими ифтитоҳ, муаррифии технологияҳо, баромадҳои коршиносон, озмунҳо ва супоридани ҷоизаҳо баргузор мешаванд.

Минтақаи намоишгоҳҳо барои муаррифии лоиҳаҳои ширкатҳои технологӣ, стартапҳо, донишгоҳҳо ва марказҳои таълимӣ пешбинӣ шудааст. Дар минтақаи омӯзиши зеҳни сунъӣ семинарҳо, маърӯзаҳои кӯтоҳ, машваратҳои касбӣ ва машғулиятҳои амалӣ баргузор мешаванд.

Dialog.tj