Бархе кишварҳои арабии минтақаи Халиҷи Форс ба Иёлоти Муттаҳида гуфтаанд, ки ташдиди таҳримҳои иқтисодӣ алайҳи Эронро дар шароити кунунӣ ғайриамалӣ медонанд. Дар ин бора рӯзномаи фароминтақавии «Раъй ал-Явм» бо истинод ба манбаъҳои дипломатӣ гузориш додааст.

Тибқи ин гузориш, кишварҳои Халиҷи Форс ба мақомоти амрикоӣ расман изҳор доштаанд, ки сиёсати пешниҳодшудаи Вашингтон барои фишори иқтисодӣ бар Эрон бо назардошти ҷуғрофиё, ҳамсоягӣ ва робитаҳои иқтисодии кишварҳои минтақа воқеӣ нест.

Манбаъҳои дипломатии ғарбӣ ба «Раъй ал-Явм» гуфтаанд, ки ҳадди ақал Имороти Муттаҳидаи Араб, Умон ва Қатар аз дастурҳо ва тасмимҳои Вазорати молияи ИМА барои ташдиди фишорҳо алайҳи Эрон истиқболи зиёд намекунанд.

Бар асоси гузориши мазкур, бархе кишварҳои минтақа, аз ҷумла Қатар, эҳтимол дорад аз иҷрои баъзе қарорҳои таҳримии ИМА сарпечӣ кунанд. Ин кишварҳо чунин таҳримҳоро бо назардошти таъсири эҳтимолии онҳо ба суботи минтақа ва талошҳо барои коҳиши танишҳо баҳсбарангез медонанд.

Ҳамзамон, дар ИМА низ дар бораи самаранокии стратегияи фишори иқтисодӣ алайҳи Эрон, ки таҳримҳо ва маҳдуд кардани интиқоли дарёиро дар бар мегирад, саволҳо матраҳ шудаанд.

Маҷаллаи амрикоии «Политико» бо истинод ба мақомоти собиқи маъмурияти Доналд Трамп, сафирони собиқи ИМА ва коршиносони минтақа навиштааст, ки дар мавриди натиҷаи сиёсати нави иқтисодии Вашингтон алайҳи Теҳрон номуайянии ҷиддӣ вуҷуд дорад.

Ҷеймс Ҷеффри, дипломати собиқи амрикоӣ, ки дар се маъмурияти ИМА, аз ҷумла давраи аввали президентии Трамп, фаъолият кардааст, гуфтааст, ки ин раванд бештар ба «ҷанги фарсоишӣ» монанд аст. Ба гуфтаи ӯ, Вазорати молияи ИМА метавонад бо тағйироти ҷузъӣ роҳҳои давр задани таҳримҳоро маҳдуд ё доираи онҳоро васеъ кунад, аммо интизори натиҷаи ҳалкунанда пас аз солҳои тӯлонии таҳримҳо ва таҷрибаи Эрон дар канорагирӣ аз онҳо душвор аст.

Тибқи гузоришҳои зикршуда, ҳадафи Вашингтон аз ташдиди фишорҳо маҷбур кардани Теҳрон ба қабули шартҳои ИМА мебошад. Аммо манбаъҳои амрикоӣ мегӯянд, ки Эрон барои таҳаммули фишорҳои иқтисодӣ омода аст ва эҳтимолан ба баъзе талабҳои Вашингтон, аз ҷумла шартҳои марбут ба ҳаракати киштиҳо тавассути тангаи Ҳурмуз, розӣ нашавад.

Дар ҳамин ҳол, маълумоти мустақил дар бораи он ки ҳамаи кишварҳои Халиҷи Форс ба сиёсати таҳримии ИМА мухолифат кардаанд, дастрас нест ва изҳороти расмии ҳамаи давлатҳои номбурда низ дар ин гузориш оварда нашудааст.

Dialog.tj