Доналд Трамп, раиси ҷумҳури Амрико, пас аз интишори гузоришҳо дар бораи коҳиши захираҳои мушакии ин кишвар, сахт хашмгин шуда, афродеро, ки чунин маълумотро фош кардаанд, ба муҷозоти зиндон таҳдид кардааст.

Ин изҳорот дар ҳоле садо медиҳад, ки ахиран расонаҳои амрикоӣ аз коҳиши захираҳои муҳимоти низомии Амрико гузориш додаанд.

Пеш аз ин, рӯзномаи “Вашингтон пост” (The Washington Post) ба нақл аз манобеи огоҳ навишта буд, ки Трамп дар ҳошияи нишасти кобина дар қароргоҳи Кэмп Дэвид аз Пит Ҳегсет, вазири дифои Амрико, дар бораи камбуди захираҳои мушакӣ тавзеҳ хостааст. Бо вуҷуди ин, Каролин Левитт, сухангӯи Кохи Сафед, чанде баъд дурустии ин гузоришро рад кардааст.

Трамп дар шабакаи иҷтимоии “Трус сошл” (Truth Social) навиштааст, ки Амрико захираҳои азими муҳимот, ба вижа баъзе навъҳои мушаххаси онро, дар ихтиёр дорад ва ин муҳимот ба миқдори зарурӣ тавлид ва ба ин кишвар таҳвил дода мешаванд.

Раиси ҷумҳури Амрико ҳамчунин, таъкид кардааст, афроде, ки “чунин маълумот”-ро нашр мекунанд, бо ҳукмҳои тӯлонии зиндон рӯбарӯ хоҳанд шуд.

Пентагон пештар аз Конгресс дархости 67 миллиард доллар буҷаи изофӣ карда буд, то хароҷоти ҷанг бо Эрон ва бозсозии захираҳои таслиҳотии худро пӯшиш диҳад.

Ба гузориши шабакаи “Си-эн-эн” (CNN) ва Маркази мутолиоти стратегӣ ва байналмилалии “CSIS”, сатҳи бархе аз захираҳои таслиҳотии Амрико ба таври қобили мулоҳиза коҳиш ёфта ва ба марҳилаи буҳронӣ расидааст.

Пештар маркази “CSIS” тахмин зада буд, ки Амрико дар ҷараёни ҷанг алайҳи Эрон, аз 27-уми феврал то 27-уми июл, аз 1500 то 1600 мушаки “Патриот” ва ҳудуди 200 мушаки раҳгири “THAAD” истифода кардааст.

Dialog.tj