Вазорати савдои Чин рӯзи панҷшанбе ҳушдор додааст, ки агар Иёлоти Муттаҳида бар тасмими якҷонибаи худ барои манъ кардани воридоти роботҳо ва табдилдиҳандаҳои нави барқии чинӣ исрор варзад, Пекин “қотеъона иқдоми ҷавобӣ” хоҳад кард ва аз манофеи худ дифоъ хоҳад намуд.

Ин вазорат аз Вашингтон хостааст, ки фавран ин маҳдудиятҳоро лағв карда, ба гуфтаи Пекин, ба “иқдомҳои нодуруст”-и худ поён диҳад. Ба гуфтаи мақомоти чинӣ, ин маҳдудиятҳо ширкатҳо ва маҳсулоти чиниро мавриди табъиз қарор дода, онҳоро саркӯб мекунад.

Комиссияи федералии иртибототи Амрико (FCC) рӯзи сешанбе эълом кард, ки барои муҳофизат аз зерсохтҳои ҳуши маснуъии ин кишвар дар баробари таҳдидҳои амниятӣ ва боз гардондани саноатҳои калидӣ ба дохили Амрико, маҳдудиятҳои наверо ҷорӣ кардааст.

Вазорати савдои Чин мегӯяд, ки Комиссияи федералии иртибототи Амрико эътирозҳои такрории Пекинро нодида гирифта, ба густариши маҳдудиятҳо алайҳи ширкатҳои чинӣ идома медиҳад.

Ин вазорат ҳамчунин, Амрикоро ба тавсеаи мафҳуми “амнияти миллӣ” муттаҳам карда, ин сиёсатро “рафтори якҷониба” ва намунае аз ихтилол дар бозор хондааст. Ба гуфтаи мақомоти чинӣ, ин иқдомҳо манофеи саноати ҳарду кишварро нодида мегирад.

Dialog.tj