Манобеи хабарӣ гузориш додаанд, ки ҳавопаймои ҳомили Бенямин Нетаняҳу, нахуствазири Исроил, пас аз чанд соат таъхир бар асари парвози паҳподҳои ношинос дар наздикии марзҳои ин кишвар, аз пойгоҳи низомӣ дар минтақаи Нақаб ба сӯйи Вашингтон парвоз кардааст.

Ба гузориши “Таймз оф-Исроил” (The Times of Israel), артиши Исроил эълом кардааст, ки ду паҳподро, ки дар минтақаи марзӣ бо Урдун шиносоӣ шуда буданд, раҳгирӣ кардааст. Пас аз ин ҳодиса, ҳавопаймои Нетаняҳу иҷозаи парвоз гирифтааст.

Дар ҳамин ҳол, хабарнигори шабакаи “Ал-Арабия” гузориш додааст, дафтари нахуствазири Исроил қаблан бидуни ироаи тавзеҳ эълом карда буд, ки парвози Нетаняҳу, ки қарор буд соати 11:00 ба вақти маҳаллӣ анҷом шавад, ба таъхир афтодааст.

Бар асоси гузоришҳо, ин ду паҳпод пеш аз вуруд ба ҳарими ҳавоии Исроил суқут дода шудаанд. То кунун манбаи партоби онҳо мушаххас нашудааст ва таҳқиқот дар ин замина идома дорад.

Қарор аст Бенямин Нетаняҳу рӯзи сешанбе дар Кохи Сафед бо Доналд Трамп, раиси ҷумҳури Иёлоти Муттаҳидаи Амрико, дидор ва гуфтугӯ кунад.

Dialog.tj