Рӯзномаи “Ню-Йорк Таймз” (The New York Times) гузориш додааст, ки дар ҳоле ки давлати Доналд Трамп имкони оғози ҳамла ба ҷунбиши “Ансоруллоҳ”-и Яманро баррасӣ мекунад, неруҳои Амрико дар Ховари Миёна пас аз тақрибан 14 шаби ҳамлаҳои ҳавоӣ ба Эрон зери фишори ҷиддӣ қарор гирифтаанд.

Ба навиштаи ин рӯзнома, ҳусиҳо ахиран, пас аз эълони муҳосираи Арабистони Саудӣ, аз ҳадаф қарор додани ду нафткаши саудӣ дар Баҳри Сурх хабар додаанд.

Дар гузориш омадааст, ки Доналд Трамп Эронро масъули ҳар гуна ҳамлаҳои минбаъдаи ҳусиҳо дониста, ҳушдор додааст, ки ҷангро ба ин гурӯҳ низ густариш хоҳад дод. Ба навиштаи “Ню-Йорк Таймз”, чунин иқдом нахустин амалиёти низомӣ алайҳи ҳусиҳо пас аз бомбаборони 52-рӯзаи Яман дар як соли пеш хоҳад буд.

Фармондеҳони пешини артиши Амрико гуфтаанд, ки ҷанг ҳамзамон дар ду ҷабҳа бо мушкилоти ҷиддӣ, аз ҷумла дар бахши омодагии неруҳои размӣ, ҳамроҳ хоҳад буд.

Бино ба ин гузориш, Амрико беш аз 12 киштии ҷангӣ, аз ҷумла ду киштии ҳавопаймобар, ҳамроҳ бо даҳҳо ҳавопаймои ҷангиро дар Баҳри Араб мустақар кардааст. Ҳамчунин, мақомоти низомӣ гуфтаанд, ки Пентагон ҷангандаҳои иловагии “F-16”-ро аз Олмон ва ҷангандаҳои пинҳонкори “F-35”-ро аз Британия ба минтақаи Халиҷи Форс интиқол медиҳад.

“Ню-Йорк Таймз” менависад, Доналд Трамп пештар таҳдид карда буд, ки бо ҳадаф қарор додани пулҳо, неругоҳҳо ва дигар зерсохтҳои ғайринизомии дорои истифодаи дугона, ҷанг алайҳи Эронро ба таври назаррас шиддат хоҳад дод. Ба навиштаи рӯзнома, ҳамзамон анҷом додани чунин ҳамлаҳо ва азсаргирии амалиёт алайҳи ҳусиҳо тавони неруи ҳавоии Амрикоро бо чолиш рӯбарӯ мекунад.

Одам Клементс, намояндаи пешини низомии Амрико дар Яман, гуфтааст: “Саволи асосӣ ин аст, ки оё Амрико бояд ҳамлаҳои ҳавоиро алайҳи ҳусиҳо аз сар бигирад ва чаро? Вашингтон аз чунин иқдом чӣ ба даст хоҳад овард?”

Ба гуфтаи ӯ, ҳамлаҳои нав ба ҷуз дастовардҳои кӯтоҳмуддат ва маҳдуд натиҷаи дигаре нахоҳанд дошт ва танҳо ҳусиҳоро барои иқдомҳои ҷавобӣ ҷасуртар хоҳанд кард.

Дар ҳамин ҳол, бархе аз коршиносони минтақа низ ба ин боваранд, ки ҳусиҳо дар ҳоли ҳозир ба дунболи ташдиди даргирӣ бо Амрико нестанд, ҳарчанд, ба гуфтаи онҳо, пешгӯии рафтори ин гурӯҳ ҳамчунон душвор аст.

Дар идомаи гузориш омадааст, ки дар ҳоли ҳозир танҳо киштии ҷангии “USS Gonzalez” дар Баҳри Сурх ҳузур дорад. Ба навиштаи рӯзнома, ҷанги ахир бо Эрон бахши зиёди мушакҳои болдор ва муҳимоти дақиқзанандаи Амрикоро масраф кардааст ва ҳамин масъала метавонад барои анҷоми амалиёти густурда алайҳи ҳусиҳо маҳдудият эҷод кунад.

Dialog.tj