Леон Панетта, раиси пешини Агентии марказии истихборотии ИМА (CIA), бо интиқод аз идомаи ҷанги Вашингтон алайҳи Эрон гуфтааст, ки Иёлоти Муттаҳида дар як “бунбасти амиқ” қарор гирифта ва ин ҷанг тадриҷан ба ботлоқе монанди ҷанги Ветнам табдил мешавад.

Леон Панетта, ки дар давраи раёсати ҷумҳурии Барак Обама раҳбарии CIA-ро бар уҳда дошт, дар мусоҳиба бо шабакаи “Си-эн-эн” (CNN) гуфтааст, ки таҷрибаи таърихӣ нишон медиҳад ҷангҳои тӯлонӣ ва бепоён ҳеч гоҳ анҷоми хубе надоранд.

Ӯ, ки қаблан вазири дифои Амрико низ буд, аз сиёсати низомии Доналд Трамп дар қиболи Эрон интиқод карда, гуфтааст, ки Кохи Сафед бидуни ҳадаф ва роҳбурди рӯшан вориди ҷанги фарсоишӣ шудааст.

Ба гуфтаи Панетта, Трамп ҳамчунон ба ҳамлаҳои низомӣ идома медиҳад, дар ҳоле ки арзёбиҳои ниҳодҳои истихборотӣ нишон медиҳанд, ки ин ҳамлаҳо Эронро водор ба ақибнишинӣ нахоҳанд кард.

Ӯ ҳамчунин, таъкид кардааст, ки идомаи ҷанг барои шаҳрвандони Амрико паёмадҳои иқтисодии ҷиддӣ ба бор овардааст. Ба гуфтаи вай, болоравии нархи нафт ва афзоиши хароҷоти зиндагӣ фишори зиёдеро бар мардум ворид кардааст.

Панетта ёдовар шудааст, ки Доналд Трамп дар оғози ҷанг гуфта буд, ки даргириҳо чаҳор ё панҷ ҳафта идома хоҳанд кард, аммо акнун наздик ба панҷ моҳ аз оғози ҷанг гузаштааст ва нишонае аз поёни он дида намешавад.

Раиси пешини CIA афзудааст, ки дурнамои хатми ҷанг “умедбахш нест” ва ба гуфтаи ӯ, Трамп амалан дар бунбаст қарор гирифта, дар ҷустуҷӯи роҳи берун шудан аз ин вазъият аст.

Ин изҳорот дар ҳолест, ки бархе аз ҷумҳурихоҳон низ нисбат ба идомаи ҷанг бо Эрон нигаронӣ кардаанд. Шелли Мур Капито, раиси Кумитаи сиёсати ҷумҳурихоҳони Сенат, гуфтааст, ки мардуми Амрико тадриҷан аз ин ҷанги тӯлонӣ хаста мешаванд.

Ҳамчунин, Ҷим Ҷастис, сенатори ҷумҳурихоҳ, бо ишора ба кушта шудани се низомии амрикоӣ дар рӯзҳои ахир гуфтааст, ки аз афзоиши талафоти неруҳои амрикоӣ нигарон аст.

Ҳамзамон, тибқи гузориш, ҳимоят аз идомаи ҷанг дар миёни ҳаводорони Доналд Трамп низ коҳиш ёфтааст. Бар асоси арзёбиҳои ахир, тақрибан аз ҳар панҷ ҳаводори ҷараёни “MAGA” як нафар бар ин бовар аст, ки ҷанг бояд, сарфи назар аз хароҷоти он, ҳарчи зудтар поён дода шавад.

Dialog.tj