Доналд Трамп, раиси ҷумҳури Амрико дар идомаи таҳдидҳо алайҳи кишварҳои гуногун, Умонро низ ба унвони понздаҳумин кишвар таҳдид ба ҳамла кард ва гуфт: “Агар Умон дар тангаи Ҳурмуз дигаргуна рафтор кунад, мунфаҷир хоҳад шуд!”

Ба гузориши Расонаи “Арабӣ 21” Трамп шаби гузашта (чаҳоршанбе) дар идомаи суханони зидду нақизи худ бо ишора ба ин ки тангаи Ҳурмуз барои ҳама боз хоҳад буд, иддао кард: “Амрико аз он муҳофизат хоҳад кард ва ин шартҳо бахше аз музокирот бо Эрон аст”.

Вай дар суханони худ бар зидди Умон, ин кишварро низ таҳдид ба ҳамла кард ва гуфт: “Умон низ монанди ҳар кишвари дигаре рафтор хоҳад кард ва дар ғайри ин сурат маҷбур хоҳем шуд, онро мунфаҷир кунем”.

Трамп дар посух ба ин суол, ки оё тавофуқи кутоҳмуддатеро, ки ба Эрон ва Умон иҷозаи контрол бар ин оброҳи ҳаётиро диҳад, хоҳад пазируфт, гуфт: “Не, тангаи Ҳурмуз барои ҳама боз хоҳад буд, ин обҳои байналмилалӣ аст ва ҳаргиз ҳеч касе контроли онро дар даст нахоҳад дошт ва мо аз он муҳофизат хоҳем кард ва ин бахше аз музокироти ҷорӣ аст”.

Коршиносон мегӯянд ин суханони Трамп алайҳи Умон дар ҳоле матраҳ мешавад, ки ин кишвар, понздаҳумин кишваре аст, ки ӯ дар ду давраи раёсати ҷумҳурии худ таҳдид ба ҳамла кардааст ё аз эҳтимоли ҳамла ба он сухан гуфта ё амалан алайҳи он иқдом кардааст.

Аз рӯйи таҳлилҳо Трамп дар давраи кунунӣ то имрӯз ба ҳафт кишвар ҳамлаи ҳавоӣ анҷом додааст, ки иборат аз Эрон, Ироқ, Нигерия, Сомалӣ, Сурия, Венесуэла ва Яман аст ва албатта бархе аз ин кишварҳо дар давраи нахусти раёсати ҷумҳури Трамп низ мавриди ҳамла қарор гирифтаанд.

Раиси ҷумҳури Амрико дар ин давра ҳамчунин, ба ҳамла ё эҳтимоли ҳамла ба ҳафт кишвари дигар таҳдид кардааст, ки иборатанд аз Канада, Колумбия, Куба, Гренландия (вобаста ба Дания), Мексика, Панама ва Умон.  Ҳамчунин, ӯ дар давраи нахусти худ низ Мексика ва Кореяи Шимолиро таҳдид карда буд.

Ба навиштаи ин расонаи арабӣ, бахше аз ин рафторҳои Трамп мумкин аст ба пайравии ӯ аз назарияи “марди девона” дар сиёсати хориҷӣ марбут шавад ва ба ибораи дигар ӯ тамоюл дорад худро фарди ғайри қобили пешбинӣ нишон диҳад ва тасаввур мекунад, ки бо ин кор душманони хориҷии ӯ таслими хостаҳои ӯ мешаванд. Таҳлилгарон мегӯянд, бо ин ҳол ин рафторҳои Трамп нишондиҳандаи рафтори таҷовузии раиси ҷумҳуре аст, ки то кунун дар соли ҷорӣ  ба ду кишвар -  Эрон ва Венесуэла ҳамла карда ва ба назар мерасад, ки дар фикри ҳамлаи севум ба Куба аст.

Оморҳо нишон медиҳад, ки Трамп то кунун аз тахминан 200 кишвари ҷаҳон, 15 кишварро таҳдид ба ҳамла кардааст ё амалан ба онҳо ҳамла кардааст. Аз ин теъдод панҷ кишвар дар Ховари Миёна қарор доранд ва ба ибораи дигар Трамп аз 20 кишвари минтақа, панҷ кишварро таҳдид ба ҳамла кардааст ё ҳадаф қарор додааст.

Dialog.tj