Тавре ки Вазорати фарҳанги кишвар хабар медиҳад, дар доираи Рӯзҳои фарҳанги Ҷумҳурии Тоҷикистон дар Ҷумҳурии Қирғизистон дар шаҳри Бишкек маросими тантанавии ифтитоҳи Рӯзҳои кинои Ҷумҳурии Тоҷикистон дар Ҷумҳурии Қирғизистон баргузор гардид.

Иттилоъ дода мешавад, ки дар чорабинӣ вазири фарҳанги Ҷумҳурии Тоҷикистон Матлубахон Сатториён, вазири фарҳанг, иттилоот ва сиёсати ҷавонони Ҷумҳурии Қирғизистон, намояндагони мақомоти давлатӣ, ҳайати дипломатӣ, аҳли фарҳангу санъат, намояндагони ҷомеаи синамо, зиёиёни эҷодиву илмии ду кишвар ва дӯстдорони кино иштирок намуданд.

“Зимни маросим вазирони фарҳанги ду кишвар таъкид карданд, ки баргузории Рӯзҳои кинои тоҷик ҷузъи муҳими ҳамкориҳои фарҳангиву гуманитарии Тоҷикистону Қирғизистон буда, ба таҳкими минбаъдаи муносибатҳои дӯстӣ, ҳамсоягии нек ва ҳамдигарфаҳмӣ миёни ду халқи бародар мусоидат менамояд”, - менависад манбаъ.

Гуфта мешавад, ки дар доираи Рӯзҳои кино дар кинотеатри «Ала-Тоо» намоиши филмҳои бадеии тоҷик ба нақша гирифта шудааст. Аз ҷумла, филмҳои «Ҳаёт зебост», «Қисса дар бораи Рустам» «Роҳи ғазаб» ба намоиш гузошта мешаванд.

Dialog.tj