Бинобар иттилои Алиҷон Салимзода, раиси Раёсати Корхонаи воҳиди давлатии бонки амонатгузории Ҷумҳурии Тоҷикистон “Амонатбонк” давоми соли гузашта аз ҷониби бонки мазкур ба андозаи 2,5 миллиард сомонӣ маблағи қарзӣ ба мизоҷон пешниҳод гардидааст.

10-уми феврал зимни нишасти матбуотии “Амонатбонк” афзуда шуд, ки дар соли 2025 аз ҳисоби захираҳои дохилию хориҷии бонки мазкур ба зиёда аз 60 ҳазор мизоҷ қарз дода шудааст.

Гуфта мешавад, ки қарзҳои додашуда ба соҳаҳои саноат 5,3 фоиз, кишоварзӣ 10,9 фоиз, истеъмолӣ 49,9 фоиз, сохтмон 4,7 фоиз, тиҷорат 9,5 фоиз, қарзҳои байнибонкӣ 17,3 фоиз ва ба дигар соҳаҳо 2,4 фоиз рост меоянд.

Дар нишаст зикр гардид, ки ҳоло сандуқи қарзии “Амонатбонк” зиёда аз 3,7 млрд сомонӣ ва шумораи қарзгирон аз рӯйи бақия зиёда аз 84 ҳазор нафарро ташкил медиҳад.

Dialog.tj