Сироҷиддин Муҳриддин, вазири корҳои хориҷии Ҷумҳурии Тоҷикистон дар як нишасти байналмилалӣ дар шаҳри Маскав аз ҷомеаи ҷаҳонӣ хост, ки таваҷҷуҳ ба вазъи Афғонистонро коҳиш надиҳанд. Ӯ гуфт, субот дар ин кишвар на фақат ба амнияти Осиёи Марказӣ, балки барои рушди ҳамкориҳои иқтисодӣ, нақлиётӣ ва энергетикӣ дар минтақа низ аҳамияти муҳим дорад.

Сироҷиддин Муҳриддин рӯзи 10-уми ноябри соли 2026 дар Форуми байналмилалӣ оид ба таъмини амнияти дастаҷамъӣ ширкат ва дар нишасти пленарии “Амнияти дастаҷамъӣ дар ҷаҳони бисёрқутбӣ” суханронӣ намуд.

Бино ба иттилои Вазорати корҳои хориҷии Ҷумҳурии Тоҷикистон Сироҷиддин Муҳриддин дар суханронии худ ба зарурати ҳамкориҳои байналмилалӣ, минтақавӣ ва такмили механизмҳои таъмини амният ва рушди муколамаи созанда дар миёни давлатҳо таъкид намудааст. Ӯ гуфтааст, имкониятҳои ҷаҳони бисёрқутбӣ аз он вобастаанд, ки кишварҳо муносибати худро то чӣ андоза бар пояи эҳтироми якдигар ва баробарҳуқуқӣ ба роҳ мемонанд.

Ҳамчунин, хабаргузории “Спутник” (Sputnik)  иттилоъ дод, ки Сироҷиддин Муҳриддин  дар ин нишаст зарурати ҳамоҳангсозии талошҳои ҷомеаи ҷаҳонӣ ва андешидани чораҳои муштаракро барои муқовимат бо хатарҳои фаромиллӣ низ муҳим донистааст.

Рӯзномаи “Ведамости” аз бахши дигари суханронии Сироҷиддин Муҳриддин, ки ба вазъияти Афғонистон бахшида шудааст, иқтибос меорад. Сироҷиддин Муҳриддин дар бораи вазъияти Афғонистон мегӯяд: “Мо Афғонистони босубот ва сулҳомезро на танҳо шарти муҳимтарини амнияти Осиёи Марказӣ, балки заминаи зарурӣ барои рушди ҳамкориҳои иқтисодӣ, нақлиётӣ ва энергетикӣ дар фазои васеътари минтақа медонем. Мо ҷонибдори ҳалли мусолиматомези сиёсӣ дар Афғонистон бар асоси муколамаи умумимиллӣ ҳастем. Ҷомеаи ҷаҳонӣ набояд таваҷҷуҳи худро ба масъалаи Афғонистон коҳиш диҳад”.

Форуми байналмилалӣ дар Маскав дар доираи раёсати Русия дар Созмони аҳдномаи амнияти дастаҷамъӣ (СААД) баргузор шудааст. Дар ҷараёни он иштирокдорон масъалаҳои мубрами амнияти байналмилалӣ ва нақши созмонҳои минтақавиро дар ҳифзи суботи ҷаҳонӣ баррасӣ кардаанд.

Dialog.tj