Владимир Путин, президенти Русия ва Си Ҷинпин, ҳамтои чинии ӯ, дар як тамоси видеоӣ дар бораи равобити дуҷониба ва ҳамкории роҳбурдӣ дар соҳаи энержӣ гуфтугӯ карданд.

Хабаргузории “Синхуа” хабар дод, ки Си Ҷинпин рӯзи чоршанбе дар Пекин дар як тамоси видеоӣ бо президенти Русия гуфтугӯ кард.

Президенти Русия дар ин тамоси видеоӣ ба ҳамтои чинии худ гуфта, ки равобити онҳо “омили муҳимми суботбахш” дар миёни ноустувории ҷаҳонӣ аст ва Маскав омода аст ҳамкории наздик бо Пекинро дар масъалаҳои ҷаҳонӣ ва минтақавӣ идома диҳад.

Вай бо ишора ба он ки ҳамкории энержӣ барои ҳар ду тараф судманд ва роҳбурдӣ аст, таъкид карда, ки тиҷорат миёни ду кишвар барои сеюмин сол пайдарпай аз 200 миллиард доллар гузаштааст ва пешбинӣ карда, ки ин раванд ба таври пайваста идома хоҳад ёфт.

Путин изҳор дошт, ки Русия ва Чин дар чандин созмони байналмилалӣ, аз ҷумла Созмони Милали Муттаҳид, БРИКС ва Созмони ҳамкории Шанхай, “нақшҳои калидӣ” ифо мекунанд.

 Ин тамоси телефонӣ чанд рӯз пас аз он сурат мегирад, ки дипломатҳои аршади ҳар ду кишвар ба мувофиқа расиданд, равобити дуҷониба метавонад имсол “ба арсаи наве” табдил шавад, дар ҳоле ки Пекин ва Маскав дар пайи афзоиши ҳамкориҳои иқтисодӣ ҳастанд.

Аз замони ҳамлаи Русия ба Украина дар авоили соли 2022, ҳамкории роҳбурдии онҳо наздиктар шудааст. Си Ҷинпин беш аз як моҳ пеш дар як тамоси телефонӣ ба муносибати Соли нав “омодагии худро барои идомаи табодулоти наздик” бо Путин иброз кард.

Охирин дидори ҳузурии онҳо дар моҳи сентябр  буд, ки Президенти Русия дар размоиши низомии бузурги Пекин ширкат кард. Дар ҷараёни ин сафар, Путин дар ҷараёни музокирот ба Си Ҷинпин гуфт, ки равобити кишварҳояшон дар “сатҳи бесобиқае” қарор дорад.

Dialog.tj