“Раванди сабз” ба раҳбарии Амруллоҳ Солеҳ эълон кард, ки неруҳои ин гурӯҳ қароргоҳи Толибон дар як мактаби вилояти Панҷшерро оташ задаанд. Аммо масъулони мактаб гуфтаанд, ки сӯхтор дар ин мактаб ба фаъолияти неруҳои Амруллоҳ Солеҳ рабт надошта, бар асари такиши балони газ рӯй додааст.

“Раванди сабз” рӯзи 12-уми ноябр хабар дод, ки қароргоҳи Толибон дар мактаби миёнаи “Хоҷа Фарҳод” дар минтақаи Абдулоҳхели ноҳияи Дараи Панҷшер тақрибан соати 23:00-и шаби чоршанбе оташ гирифтааст.

Тибқи иттилои ин гурӯҳ Толибон посбони мактаб бо номи Зариф, фарзанди Муҳаммад Фаридро боздошт кардаанд. “Раванди сабз” гуфтааст, ки ин шахс ба сӯхтор ва фаъолияти гурӯҳ рабт надорад.

Сарчашмаҳои маҳаллӣ дар ноҳияи Дараи Панҷшер сӯхтор дар мактабро тасдиқ карда, гуфтаанд, дар натиҷаи сӯхтор чор утоқи мактаб ва боми он осеб дидааст.

Ин дар ҳолест, ки директори мактаб иддаои “Раванди сабз” – ро рад карда, мегӯяд сӯхтор бар асари таркиши балони газ рӯй додааст.

Dialog.tj