Ҳукумати Покистон гуфт, ки аз оғози татбиқи барномаи боз гардондани шаҳрвандони хориҷии ғайриқонунӣ аз тирамоҳи соли 2023 то ба имрӯз беш аз 1 миллиону 400 ҳазор шаҳрванди Афғонистон ба кишварашон боз гардонда шуданд.

Ин иттилоъ дар ҷаласаи хоси Ҳукумати Покистон таҳти раёсати Шаҳбоз Шариф, сарвазири Покистон дар Исломобод пешниҳод гардид. Дар ҷаласа аъзои ҳукумат, роҳбарони иёлот ва фармондеҳони артиши Покистон ҳузур доштанд.

Сарвазири Покистон бо изҳори нигаронӣ аз вазъияти ахир дар марзҳои муштараки ду кишвар гуфт, ки ҳукумати Толибон дар Афғонистон нисбат ба гурӯҳҳои террористӣ дар қаламрави худ саҳлангорӣ карда, қонунҳои марзиро поймол намуда, ба қаламрави Покистон ҳамла кардааст.

Дар ҷаласа зикр шуд, ки дар оянда фақат он шаҳрвандони Афғонистон, ки раводиди қонунии Покистонро доранд, ҳаққи иқомат дар ин кишварро хоҳанд дошт ва нисбат ба дигар афроди ғайриқонунӣ мувофиқи қонун чораҷӯӣ мешавад. Ҳамчунин, муҳлати ихроҷи шаҳрвандони Афғонистон дигар тамдид намешавад.

Мақомот хабар доданд, ки аз оғози иҷрои ин барнома то ба рӯзи 16-уми октябри соли 2025, дар маҷмуъ 1 477592 шаҳрванди Афғонистон ба кишварашон боз гардонда шуданд.

Бар асоси қарорҳои нав паноҳ додан ё ҷой додани шаҳрвандони ғайриқонунӣ дар меҳмонхонаҳо ва манзилҳои хусусӣ ҷиноят шумурда мешавад ва бо қонуншиканон мувофиқи муқаррарот сахт муносибат хоҳад шуд.

Шаҳбоз Шариф аз ниҳодҳои вобаста ва неруҳои марзбонӣ даъват кард, ки дар вақти боз гардондани шаҳрвандони хориҷӣ аз эҳтироми ҳуқуқ ва шарафи инсонӣ ғофил набошанд.

Дар рӯзҳои ахир, ҳамзамон бо даргириҳои марзӣ миёни Покистону Толибон, вазир дифои Покистон гуфт, ки “замони боз гардондани ҳама шаҳрвандони Афғонистон ба кишварҳои худ фаро” расидааст.

Dialog.tj