Рӯзи 10-уми феврали соли ҷорӣ Шурои амнияти Созмони Милали Муттаҳид бо баргузор намудани нишасте оид ба масъалаи таҳдиди гурӯҳҳои террористӣ, бахусус ДОИШ ҳушдор дод, ки фаъол шудани шохаи хуросонии он дар Афғонистон таҳдиди ҷиддӣ барои субот ва амнияти ин кишвар, минтақа ва ҷаҳон аст.

Владимир Воронков, муовини Дабири кулли СММ дар кори мубориза бар терроризм дар нишасти зикршуда гуфт, ки ДОИШ бар сулҳу суботи байналмилалӣ таҳдид дорад. Ӯ идомаи таҳдиди “ДОИШ-и Хуросон”-ро ҳушдор дода, таъкид намуд, ҳомиёни ин гурӯҳи террористӣ ҳамлаҳоеро дар Аврупо тарҳрезӣ мекунанд. Вай таъкид намуд, ки ин гурӯҳ талош дорад, афродеро аз кишварҳои Осиёи Марказӣ ҷалб кунад.

Владимир Воронков аз кишварҳои узви СММ хост, ки нагузоранд Афғонистон ба “паноҳгоҳи амнияти гурӯҳҳои террористӣ” табдил ёбад.

“Гузоришҳо нишон медиҳанд, ки теъдоди ками ҷангҷӯёни террористи хориҷӣ ба сафари худ ба Афғонистон идома медиҳанд”- гуфт Владимир Воронков.

Дороти Ши, муовини намояндаи Иёлоти Муттаҳидаи Амрико дар СММ низ гуфт, ки шохаи хуросонии ДОИШ таҳдиди ҷиддӣ ба амнияти ҷаҳон аст: “Мо аз қобилиятҳои шохаи хуросонии ДОИШ барои тарҳрезӣ ва анҷоми ҳамлаҳо, инчунин, аз маъракаҳои ҷалбу ҷазби он, бахусус дар Афғонистон ва Покистон нигарон ҳастем”.

Фу Сун, намояндаи Чин дар СММ бидуни зикри ҷузъиёт гуфт, ки террористони вобаста ба шохаи хуросонии ДОИШ, Алқоида ва Ҷунбиши террористии Туркистони Шарқӣ, ки гурӯҳҳои зидди Ҳукумати Чин ҳастанд, дар Афғонистон фаъоланд ва “бо ҳам ҳамкорӣ доранд”.

“Чин аз ҳукумати муваққати Афғонистон мехоҳад, то барои маҳв кардани ҳама созмонҳои террористӣ, ки дар Афғонистон ҷо гирифтаанд, иқдоми машҳуд ва қобили исбот бардорад” – таъкид намуд Фу Сун.

Василий Небензя, намояндаи Русия дар СММ афзоиш ёфтани таҳдидҳои террористиро ба хориҷ шудани Амрико ва НАТО аз Афғонистон вобаста дониста, таъкид кард, ки “рушди фаъолияти ДОИШ-и Хуросон тасодуфӣ нест”.

“Неруҳои НАТО ҳангоми хуруҷи шитобзада аз Афғонистон миқдори зиёди таҷҳизот ва муҳимотро боқӣ гузоштанд, ки ба дасти ДОИШ афтидааст” – гуфт Василий Небензя.

Мунир Акрам, намояндаи Покистон дар Созмони Милали Муттаҳид ба суханони намояндаи Амрико дар ин Созмон вокуниш нишон дод. Мунир Акрам сухани намояндаи Амрико дар хусуси маркази ҷалбу ҷазби неруҳои ДОИШ шудани Покистонро рад намуда, гуфт, ки “Афғонистон ҷойи ҷалбу ҷазб ва осон намудани фаъолиятҳои шохаи хуросонии ДОИШ аст”.

Ҳукумати Толибон то ҳанӯз ба нигаронии қудратҳои бузург дар Шурои амнияти Созмони Милали Муттаҳид оид ба фаъол шудани шохаи хурусонии ДОИШ иттилоъ надодааст. Вале дар гузашта ҳамеша ҳузур ва фаъолияти ДОИШ-ро камранг ҷилва дода, таъкид мекард, ки он “бузургнамоӣ” аст. Онҳо таъкид кардаанд, ки ба ҳеч гурӯҳ иҷозаи фаъолият дар дохили хоки Афғонистонро нахоҳанд дод, то таҳдиди ҷиддӣ барои кишварҳои ҳамсоя ва минтақа эҷод нашавад.

Dialog.tj