Саломе Зурабишвилӣ, президенти ҳозираи Гурҷистон бо вуҷуди ба охир расидани муҳлати ваколаташ барои рафтан аз мансаб худдорӣ кард ва гуфт парлумон “ғайриқонунӣ” аст.

Саломе Зурабишвилӣ таъкид кард, ки ваколати ӯ то замони интихоби “Парлумони қонунӣ” идома хоҳад кард.

Дар чор рӯзи охир эътирозҳои саросарӣ дар Гурҷистон идома дорад. Неруҳои вижаи ин кишвар барои пароканда кардани эътирозгарон дар назди бинои парлумон аз неруҳои амниятӣ ва мошинҳои обпош истифода карданд.

Эътирозгарон баъди он ба майдони марказии Гурҷистон омаданд, ки ҳукумат тасмим гирифт, гуфтугӯҳои пайвастан ба Иттиҳоди Аврупоро то соли 2028 ба таъхир андозад. Эътирозгарон талаб карданд, ки раванди ҳамгироӣ бо Иттиҳоди Аврупо ба таъхир андохта нашавад.

Интихоботи парлумонӣ дар ин кишвар, ки чанд моҳ қабл сурат гирифт, аз назари мухолифон пур аз тақаллуб будааст. Онҳо талаб доранд, ки интихоботи парлумонӣ аз сар гузаронида шавад. Президенти Гурҷистон низ гуфтааст, ки парлумони навро қабул надорад ва то замони баргузор шудани интихоботи парлумонӣ дар мақоми худ боқӣ мемонад.

Dialog.tj