Дар доираи таҷлили Рӯзи ҷаҳонии футбол рӯзи шанбе - 25-уми май дар тамоми минтақаҳои Тоҷикистон бахшида ба ин рӯз чорабиниҳо баргузор карда мешаванд. дар ин бора Федератсияи футболи Тоҷикистон хабар додааст.

Дар дувоздаҳ шаҳру ноҳияҳои Тоҷикистон – Душанбе, Хуҷанд, Данғара, Турсунзода, Ҳисор, Кӯлоб, Хоруғ, Мурғоб, Ашт, Ҷалолиддини Балхӣ, Ёвон ва Рашт фестивалҳои ҷашнии футбол баргузор мешаванд, ки дар онҳо тақрибан 5 ҳазор нафар иштирок мекунанд. Фестивали асосӣ 25-уми май дар Варзишгоҳи марказии ҷумҳуриявии шаҳри Душанбе баргузор мешавад, ки дар он 600 нафар иштирок мекунанд.

Илова бар ин, ба ифтихори Рӯзи ҷаҳонии футбол пеш аз бозиҳои шанбеи лигаҳои олӣ ва якуми Тоҷикистон, инчунин, бозиҳои лигаи футболи занонаи Тоҷикистон аксияҳо баргузор мешаванд.

Бояд қайд кард, ки 7-уми май Ассамблеяи генералии СММ қатъномаеро қабул кард, ки тибқи он 25-уми май ҳамчун Рӯзи ҷаҳонии футбол пазируфта шуд. Ташаббуси эълони Рӯзи ҷаҳонии футболро президенти Ассотсиатсияи футболи Осиёи Марказӣ (CAFA), роҳбари Федератсияи футболи Тоҷикистон муҳтарам Рустами Эмомалӣ пешниҳод намуд.

Манбаъ: АМИТ Ховар