Ҷумҳурии Тоҷикистон дар доираи як барномаи муштараки минтақавии мубориза бо паёмадҳои тағйирёбии иқлим беш аз 72 миллион евро дарёфт хоҳад кард.

Ин маблағ барои барқарор сохтани ҷангалу чарогоҳҳо, истифодаи сарфакоронаи об ва дастгирии кишоварзон равона хоҳад шуд.

Барномаи “Манзараҳои ба иқлим устувор дар Осиёи Марказӣ” (CLiCA) Тоҷикистон, Ӯзбекистон ва Қирғизистонро фаро мегирад. Арзиши умумии он 264,4 миллион евро буда, тасдиқи барнома дар ҷаласаи шурои Фонди иқлимии сабз, ки рӯзҳои 26 -29 октябр дар Кореяи Ҷанубӣ доир шуд, сурат гирифтааст.

Бар асоси гузориши расонаҳои Тоҷикистон аз маблағи барои Тоҷикистон пешбинишуда 35, 09 миллион евро гранти Фонди иқлими сабз ва 2,48 миллион евро кумаки грантии ҳукумати Олмон аст. Ҳамчунин, гирифтани 30 миллион евро қарз аз Бонки сармоягузории Аврупо пешбинӣ шудааст, вале ин маблағ ҳанӯз ниёз ба созишҳои иловагӣ дорад.

Ҳукумати Тоҷикистон низ дар татбиқи барнома ба маблағи 4,68 миллион евро саҳми ғайринақдӣ мегузорад.

Қисми асосии маблағ барои барқарор кардани ҷангалҳо ва чарогоҳҳои харобшуда, ҷорӣ намудани технологияҳои сарфаи об ва парвариши зироатҳои ба тағйирёбии иқлим тобовар истифода мешавад. Ҳамчунин, беҳтар кардани боғдорӣ, барқарорсозии ҳосилхезии хок ва дастгирии молиявии деҳқонон аз ҳадафҳои барнома мебошанд.

Татбиқи барномаро Маркази татбиқи лоиҳаҳои сармоягузории назди Ҳукумати Тоҷикистон дар ҳамкорӣ бо созмони GIZ ва шарикони дигар ба уҳда мегиранд.

Аз кишварҳои ширкаткунандаи барнома маблағи бештар ба Ӯзбекистон – 103, 75 миллион евро пешбинӣ шудааст. Барои Қирғизистон 74, 49 миллион евро ҷудо мешавад. Тақрибан 13,89 миллион еврои дигар барои чорабиниҳои муштараки минтақавӣ ва хароҷоти умумӣ пешбинӣ шудааст.

Ин барнома барои 7 сол барномарезӣ шудааст. Интизор меравад, ки он ба коҳиши осебпазирии минтақаҳои кишоварзӣ аз тағйирёбии иқлим ва беҳтар кардани идоракунии захираҳои табиӣ мусоидат менамояд.

Dialog.tj