Вазири пешини корҳои хориҷии Амрико Ҷон Керрӣ гуфтааст, ки Доналд Трамп бо такя ба фарзияҳои нодуруст амалиёти низомӣ алайҳи Эронро оғоз карда, худро дар мавқеи бисёр номусоид барои музокирот қарор додааст.

Ба гузориши расонаҳои Амрико, Ҷон Керрӣ рӯзи панҷшанбе дар суҳбат бо Кристиан Аманпур, муҷрии шабакаи “CNN”, дар бораи эҳтимоли оғози дубораи ҷанг аз ҷониби раиси ҷумҳури Амрико изҳори назар кардааст.

Ӯ гуфтааст, вазъ то ҳадде пешгӯинашаванда аст, ки тақрибан ҳар ҳодисае метавонад рух диҳад.

Керрӣ ҳамчунин, таъкид кардааст, ки оғози ҳамлаи низомӣ пас аз интихоботи миёндавраии Амрико иштибоҳи бузург хоҳад буд. Ба гуфтаи ӯ, чунин иқдом наметавонад Эронро ба тағйири мавқеъ водор кунад ё барои бозгашт ба мизи музокирот ташвиқ намояд, балки метавонад онро аз музокирот дуртар созад.

Керрӣ: “Трамп барои расидан ба тавофуқ пешниҳоди мушаххас надод”

Вазири пешини корҳои хориҷии Амрико ҳангоми ишора ба хуруҷи Трамп аз тавофуқи ҳастаии Барномаи муштараки ҷомеъ (БАРҶОМ) суол гузоштааст, ки агар раиси ҷумҳури Амрико воқеан мехост ба тағйирот ва тавофуқи беҳтар даст ёбад, чаро пешниҳоди мушаххасе рӯйи миз нагузошт?

Ӯ ҳамчунин, пурсидааст, ки чаро Вашингтон барои дарёфти посухи Теҳрон ё оғози даври нави музокирот иқдоми мушаххас накард.

Керрӣ дар идома гуфтааст, ки Трамп дар моҳҳои гузашта бар асоси яксилсила фарзияҳои нодуруст шитобкорона вориди ҷанг шуд. Ба гуфтаи ӯ, ин фарзияҳо зиндагии мардумро дар саросари ҷаҳон гаронтар ва хатарноктар кардаанд.

Вазири пешини корҳои хориҷии Амрико таъкид кардааст, ки Трамп бо ин иқдом худро дар мавқеи бисёр номусоид барои музокирот қарор додааст. Бо вуҷуди ин, ӯ ҳанӯз бар ин назар аст, ки Амрико метавонад ба тавофуқе, ки қаблан вуҷуд дошт, хеле наздик шавад.

“Сохтани бомбро бо бомбаборон наметавон боздошт”

Керрӣ ҳамчунин, бо ишора ба ҳамлаи низомии Амрико ва нооромиҳо дар Ховари Миёна гуфтааст, ки ба даст овардани имтиёзҳои бештар нисбат ба он чӣ қаблан дар тавофуқ пешбинӣ шуда буд, кори осоне нахоҳад буд.

Ӯ дар айни замон изҳори умедворӣ кардааст, ки шояд дар баъзе масъалаҳо имкони ба даст овардани натиҷаҳои иловагӣ вуҷуд дошта бошад.

Керрӣ дар бахши дигари суҳбаташ таъкид кардааст: “Шумо наметавонед тарзи сохтани бомбро бо бомбаборон аз байн баред”.

Ба бовари ӯ, роҳи асосии ҳалли масъала ҷалби воқеӣ ба дипломатияи воқеӣ аст. Ин дипломатия метавонад ҳамзамон дар чанд масир пеш бурда шавад: яке дар сатҳи ошкоро ва дигаре ба таври махфӣ, бо ҳамоҳангии равшан.

Dialog.tj