Кореяи Шимолӣ беш аз 10 мушаки баллистикии кӯтоҳпарвозро ба самти Дарёи Шарқӣ (Баҳри Ҷопон) партоб кардааст. Артиши Кореяи Ҷанубӣ аз ин ҳодиса хабар дода, эълом кардааст, ки назорат ва омодагии худро барои муқобила бо партобҳои эҳтимолии баъдӣ тақвият медиҳад.

Ба гузориши расонаҳои байналмилалӣ, мушакҳо тақрибан соати 12:30 ба вақти маҳаллӣ аз минтақаи Вонсан партоб шудаанд. То кунун дар бораи масофаи тайкардаи онҳо маълумоте нашр нашудааст.

Ситоди муштараки артиши Кореяи Ҷанубӣ ҳамчунин, эълом кардааст, ки Сеул, Вашингтон ва Токио маълумоти марбут ба мушакҳои баллистикии Кореяи Шимолиро бо ҳам мубодила мекунанд ва дар ҳолати омодабош қарор доранд.

17-умин партоби мушакӣ дар соли ҷорӣ

Партоби ахир 17-умин мавриди партоби мушакҳои баллистикии Кореяи Шимолӣ дар соли ҷорӣ ва аввалин партоб пас аз 17 рӯзи таваққуф ба шумор меравад.

Кореяи Шимолӣ бори охир рӯзи 12-уми октябр чанд мушаки баллистикиро ба самти Баҳри Ҷопон партоб карда буд.

Идомаи фишорҳо ба Пхенян

Ин иқдом дар ҳоле сурат гирифтааст, ки як рӯз пеш Кореяи Ҷанубӣ, ИМА ва дигар шарикони онҳо бори дигар ба пойбандии худ ба ҳадафи халъи силоҳи ҳастаии Кореяи Шимолӣ таъкид карданд.

Фишори кишварҳои ғарбӣ ва муттаҳидони онҳо ба Пхенян ба далели барномаҳои ҳастаӣ ва мушакии ин кишвар идома дорад.

Дар баёнияи муштараке, ки як рӯз пеш нашр шуд, 11 кишвар ҳамроҳ бо Иттиҳоди Аврупо аз таҳримҳои ахир алайҳи Кореяи Шимолӣ дар робита ба фаъолияти киберӣ ва ҳамкориҳои низомии ин кишвар бо Русия истиқбол карданд.

Онҳо ҳамчунин, аз кишварҳои узви Созмони Милали Муттаҳид хостанд, ки қатъномаҳои таҳримӣ алайҳи Пхенянро пурра иҷро кунанд.

Dialog.tj