Бо ташаббуси Сарредаксияи илмии Энсиклопедияи миллии тоҷик китоби «Донишнома»-и Абуалӣ ибни Сино нашр шуд.

Тавре ки манбаъ навиштааст, китоби мазкур дар ҳаҷми 604 саҳифа ва ба 3 забон форсӣ/тоҷикӣ, русӣ ва англисӣ рӯйи чоп омад.

Афзуда мешавад, ки «Донишнома», ки бо номҳои «Донишномаи Алоӣ», «Китоби Алоӣ» ва «Ҳикмати Алоӣ» низ маъруф аст, аз нахустин осори  мукаммали илмӣ-фалсафӣ ба забони форсӣ-тоҷикӣ ба шумор меравад. Ибни Сино ин асарро ба номи Алоуддавлаи Дайламӣ – ҳокими Исфаҳон таълиф карда ва дар он ба баррасии масъалаҳои бунёдини фалсафа, мантиқ, илоҳиёт ва табииёт пардохтааст.

"Аҳаммияти вижаи ин китоб дар он аст, ки Ибни Сино бар хилофи бисёре аз асарҳои илмии худ, ки ба забони арабӣ навиштааст, «Донишнома»-ро ба забони модарии худ – форсӣ-тоҷикӣ таълиф карда ва аз ин тариқ тавоноии забони форсиро дар баёни мафҳумҳои дақиқ ва печидаи илмӣ, нишон додааст", - зикр мегардад дар иттилоия.

Иттилоъ дода мешавад, ки дар таҳияи асари мазкур аз матнҳои пешини «Донишнома» ба хатти кириллӣ, тарҷумаҳои русии он ва дигар сарчашмаҳои илмӣ истифода шудааст.

Dialog.tj