Намояндаи парлумони Аврупо дар Фаронса гуфт, ки музокироти кишварҳои аврупоӣ бо гурӯҳи террористии Толибон дар хусуси бозгардондани паноҳҷӯёни афғон боиси зери по шудани мавқеи Аврупо дар масъалаи ҳуқуқи инсон ва расман эътироф накардани ҳукумати Толибон шавад.

Мунир Сутурӣ, узви парлумони Аврупо аз Фаронса гуфт, музокира бо Толибон дар масъалаи боз гардондани муҳоҷирони афғон бо арзишҳои демократӣ ва принсипҳои асосии Иттиҳоди Аврупо мухолифат мекунад.

Ин вакили парлумони Иттиҳоди Аврупо дар мақолае дар сомонаи “Европа экология” навишт, мавқеи Иттиҳоди Аврупо дар ин масъала, на дар Шурои корҳои хориҷии ин иттиҳод баррасӣ шудааст ва на аз сӯи парлумони Аврупо ба тасвиб расидааст.

Ӯ таъкид намуд, ки Толибон бар ивази ҳамкорӣ барои боз гардондани паноҳҷӯёни афғон аз кишварҳои аврупоӣ хостаанд, ки намояндагӣ ва сафоратхонаҳои Афғонистон дар кишварҳои аврупоиро дар ихтиёри онҳо гузоранд ва ба Афғонистон кумаки иқтисодӣ кунанд.

Мунир Сутурӣ мегӯяд, нигаронӣ аз паноҳҷӯён дар кишварҳои Аврупо дигар фақат ба ҳукуматҳои ростгарои ин кишварҳо вобаста нест. Ӯ таъкид кард, ки ҳатто ҳукуматҳои сотсиал-демократӣ низ зери таъсири ин раванд қарор гирифтаанд. Ӯ аз ҳукумати Мете Фредериксен дар Дания, эътилофи ҳокими Олмон бо роҳбарии Фридрих Мертс мисол овард, ки дар ҳайати онҳо сотсиал-демократҳо ҳузур доранд.

Ин намояндаи парлумони Иттиҳоди Аврупо гуфт, чунин равиш метавонад боиси он шавад, ки ҳукуматҳои аврупоӣ ва Комиссияи Аврупо аз баъзе принсипҳое, ки пояи низоми демократии ин иттиҳодияро ташкил медиҳанд, даст кашанд. Ӯ ҳушдор дод, ки агар кишварҳои аврупоӣ барои боз гардондани паноҳҷӯёни афғон бо Толибон, сарфи назар аз гузоришҳо дар хусуси нақзи густурдаи ҳуқуқи инсон дар Афғонистон музокира кунанд, эҳтимол дорад, дар оянда ҳамин усулро дар муносибат бо дигар ҳукуматҳо истифода кунанд.

“Шояд фардо барои бозгардонидани шаҳрвандони Русия ва Эрон ба кишварҳояшон бо Владимир Путин ё руҳониёни Эрон низ музокира кунанд. Ин авҷи зиддият аст” – навиштааст Мунир Сутурӣ дар мақолаи худ.

Ӯ аз Йоханнес Лухнер, муовини бахши муҳоҷират дар Комиссияи Аврупо ва яке аз ташкилкунандагони нишасти Брюссел хост, дар хусуси музокира бо Толибон ба парлумони Иттиҳоди Аврупо шарҳ диҳад.

Dialog.tj