Федератсияи Русия барои содирот 100 ҳазор тонна сӯзишвории иловагӣ ба Тоҷикистон ҷудо мекунад. Баъди ин қарор ҳаҷми умумии воридоти сӯзишвории дизелӣ ба Тоҷикистон дар соли 2026 ба 550 ҳазор тонна мерасад.

Ин қарор баъди он гирифта шуд, ки Тоҷикистон ҳаҷми пешбинишудаи воридоти сӯзишвориро бар асоси созиши қаблӣ пурра истифода кардааст.

Дар ин бора хабаргузории “Ройтерз” бо истифода ба манобеи худ хабар додааст.

Бар асоси созиши нави мақомоти Русия ва Тоҷикистон ҳаҷми маҳсулоти нафтие, ки Русия имсол бидуни боҷи гумрукӣ ба Тоҷикистон интиқол медиҳад, аз 1,2 миллион тонна бештар хоҳад шуд. Ба ин миқдор маҳсулоти нафтӣ, ба ғайр аз сӯзишвории дизелӣ, бензин, сӯзишворӣ барои ҳавопаймо, гази моеъ, битум, кокси нафтӣ ва мазут низ дохил мешаванд.

Тоҷикистон қисми зиёди талаботи дохилии худро ба маҳсулоти нафтӣ аз ҳисоби воридот таъмин мекунад. Аз ин рӯ, тағйирот дар ҳаҷми интиқол аз Русия метавонад ба бозори сӯзишвории кишвар таъсир расонад.

Русия дар айни замон содироти бензин ва дизелро ба як қатор бозорҳои хориҷӣ маҳдуд кардааст. Аммо ин маҳдудиятҳо ба кишварҳое, ки бо Маскав созишномаҳои дуҷонибаи таъминоти имтиёзнок доранд, пурра татбиқ намешаванд. Тоҷикистон, сарфи назар аз узвият надоштан дар Иттиҳоди иқтисодии Авруосиё, ҳамасола мустақиман бо Русия дар ин замина созиш мекунад.

Тибқи арзёбии тоҷирони соҳаи энергетика, дар даҳ моҳи аввали соли ҷорӣ Русия ба Тоҷикистон беш аз 370 ҳазор тонна сӯзишвории дизелӣ фиристодааст. Миқдори иловагии ҷудошуда метавонад барои қонеъ кардани талаботи афзоянда дар фасли зимистон ва таъмини фаъолияти нақлиёт, саноат ва кишоварзӣ истифода шавад.

Бо вуҷуди ин, Тоҷикистон барои коҳиш додани вобастагӣ аз як манбаи таъминот имкониятҳои дигарро низ меомӯзад. Дар моҳҳои охир масъалаи воридоти маҳсулоти нафтӣ аз Эрон, Қазоқистон, Туркманистон ва Беларус баррасӣ шудааст.

Ин иқдом дар ҳоле сурат мегирад, ки бозори энергетикии минтақа зери таъсири маҳдудиятҳои содиротӣ ва тағйирёбии ҳаҷми таъминот қарор дорад. Барои Тоҷикистон, ки имкониятҳои маҳдуди коркарди дохилии нафт дорад, пайдо кардани роҳҳои алтернативии воридот метавонад дар таъмини устувори бозори сӯзишворӣ нақши муҳим дошта бошад.

Dialog.tj